Foto: ashyq derekkóz
Tongcheng Travel iri onlain-týristik kompaniiasynyń derekterine sáikes, bizdiń elimiz QHR-da Ulttyq kún men Kúzdiń ortasy merekesin atap ótýge arnalǵan 8 kúndik demalysta halyqaralyq qonaq úilerdi brondaýdyń eń joǵary ósimi baiqalǵan 5 sheteldik baǵytqa kirdi, dep habarlaidy Ult.kz.
Biyl Qytaida shetelge uzaqmerzimdi toptyq týrlarǵa qyzyǵýshylyq artyp keledi. Olardyń sany jyldyq kórsetkishpen salystyrǵanda eki esege jýyq ósti. Mereke kúnderi QHR týristeri tarapynan Ortalyq Aziia, Taiaý Shyǵys jáne Afrikanyń birqatar elderinde halyqaralyq qonaq úilerdi brondaý edáýir kóbeigeni baiqalady. Suranystyń ósimi boiynsha kóshbasshylar bestigine Saýd Arabiiasy, Egipet, Jańa Zelandiia, Qazaqstan jáne Birikken Arab Ámirlikteri kirdi.
"Qazaqstan Qytai aýditoriiasy úshin tartymdy baǵytqa ainalýda. Biylǵy 9 aida ǵana elimizge QHR kelýshiler qatary 675 myńnan asty. Al ótken jyldyń 12 aiynda bul kórsetkish 655 myń adamdy quraǵan bolatyn. Bul — elimizge degen joǵary qyzyǵýshylyqty jáne Qytaidyń týristik naryǵynda elimizdi ilgeriletý, vizalyq rásimderdi jeńildetý jáne eki el arasyndaǵy tikelei áýe qatynastaryn keńeitý boiynsha júieli jumystyń tiimdiligin kórsetedi", — dedi "Kazakh Tourism" UK" AQ Basqarma tóraǵasynyń mindetin atqarýshy Daniel Serjanuly.
Atap ótken jón, QHR iri izdeý júiesi Baidu derekterine sáikes, 2025 jylǵy qyrkúiekte Qazaqstan jaily izdenister sany táýligine orta eseppen 420–430 myńdy quraǵan. Eń joǵary belsendilik Gýandýn men Chjetszian provintsiialarynda, Beijiń qalasynda, Shyńjań-Uiǵyr avtonomiialyq aýdanynda jáne Shandýn provintsiiasynda baiqaldy. Bul Qazaqstanǵa degen qyzyǵýshylyq shekara mańyndaǵy aýmaqtarmen shektelmei, Qytaidyń ekonomikalyq turǵydan damyǵan óńirlerin de qamtyǵanyn kórsetedi.
