I Halyqaralyq TurkicSkills-2025 kásibi sheberlik chempionaty óz máresine jetti, dep habarlaidy Ult.kz.
Qazaqstan quramasy jarystyń basty jeńimpazy atanyp, túrki elderi arasynda tehnikalyq jáne kásiptik maman daiarlaýda kóshbasshy ekenin dáleldedi.
Elimizdiń júlde qorjyny 6 altyn, 2 kúmis medal jáne 1 «Úzdik medalonmen» tolyqty. Bul jeńis Memleket basshysynyń tapsyrmasyna sáikes «Jumysshy mamandyqtar jyly» aiasyndaǵy reformalardyń nátijeli júzege asyp jatqanyn aiǵaqtaidy.
Esterińizge sala keteiik, 4-9 qazan aralyǵynda Aqtaý qalasynda Jumysshy mamandyqtar jyly aiasynda ótken TurkicSkills-2025 chempionatyna Túrkiia, Ázerbaijan, Majarstan, Ózbekstan, Qyrǵyzstan jáne Qazaqstannan 70-ke jýyq kolledj stýdentteri men jas maman qatysty. Olar injeneriia, aqparattyq tehnologiialar, óndiris, robototehnika jáne qyzmet kórsetý salalaryn qamtityn 10 quzyrettilik boiynsha baq synady.
Jarystyń jabylý rásiminde sóz sóilegen QR Oqý-aǵartý vitse-ministri Asylbek Ahmetjanov bul chempionattyń túrkitildes memleketterdiń tehnikalyq jáne kásiptik bilim berý uiymdarynyń arasynda Qazaqstannyń bastamasymen alǵash ret aýqymdy túrde uiymdastyrylǵanyn atap ótti.
«TurkicSkills chempionaty – túrkitildes memleketter arasyndaǵy tehnikalyq jáne kásiptik uiymdar yntymaqtastyǵynyń jańa kezeńine jol ashatyn mańyzdy shara. Bul kúnder dostyq pen ózara túsinistiktiń, yntymaqtastyq pen tájiribe almasýdyń jarqyn úlgisine ainaldy», - dep atap ótti vitse-ministr.
WorldSkills International keńesiniń múshesi Rei Inglish Qazaqstannyń halyqaralyq deńgeidegi áleýetin erekshe atap ótti.
«Chempionatynyń aýqymy men uiymdastyrylý sapasy – Qazaqstannyń álemdik deńgeidegi kásibi sheberlik saiystaryn ótkizýge tolyq daiyn ekenin kórsetedi. Bul tájiribe bolashaqta WorldSkills nemese WorldSkills Europe siiaqty halyqaralyq jarystardy qabyldaýǵa múmkindik beredi», – dedi ol.
Chempionatty tamashalaýǵa 5 myńnan astam adam keldi, kolledjder men kásiporyndar arasynda 100-ge jýyq yntymaqtastyq memorandýmy jasaldy.
