«Qazaqstan halqyna» qaiyrymdylyq qorynyń negizin qalaýshylar kimder jáne qor quryltaishylarynyń qandai quqyǵy bar? Atalǵan suraqtarǵa qor tóraǵasy Bolat Jámishev jaýap berdi, dep habarlaidy QazAqparat.
«Birneshe qoǵamdyq birlestik birigip «Qazaqstan halqyna» qorynyń quryltaishysy bolyp otyr. Atap aitqanda 4 qoǵamdyq uiym. Nege ol 4 uiym degen suraqtar da qoiylyp jatyr. Atalǵan uiymdar osyǵan deiin de memlekettik organdarmen birlesip, densaýlyq saqtaý, bilim jáne áleýmettik salada qaiyrymdylyq sharasymen turaqty ainalysyp keledi. Jáne sol 4 qoǵamdyq uiym joǵaryda atalǵan sala ministrlikteriniń usynysymen tańdaldy. Osy tusta erekshe aityp ótkim keledi, quryltaishylardyń qatysýshylar sekildi quqyǵy joq. Olarǵa arnaiy quqyq berilmeidi. Olar tek qor jumysynyń bastalýyna serpin berdi, qaiyrymdylyqty alǵashqy bolyp bastady. Qor az ýaqyttyń ishinde quryldy, sondyqtan osyndai sheshim qabyldandy» - dedi Bolat Jámishev Habar 24 arnasynyń «Oshakbaev LIVE» baǵdarlamasynyń efirinde.
Onyń aitýynsha, kez kelgen qoǵamdyq uiym qor qatysýshysy bola alady. Basty talap - qaiyrymdylyq salasynda tájiribeniń bolýy.
«Qor jumysyna úles qosamyn degen qoǵamdyq uiymdar men birlestikterge esigimiz ashyq. Qor - bireýdiń jekemenshigi emes, halyqtiki jáne halyq úshin qyzmet etedi», - deidi ol.
