Qaiyrymdylyq jasap, qorǵa aýdarǵan aqshany keri qaitaryp alý múmkindigi bar ma? Bul suraqqa «Qazaqstan halqyna» qorynyń tóraǵasy Bolat Jámishev jaýap berdi, dep habarlaidy QazAqparat.
«Qordyń biýdjetin qamqorshylyq keńes bekitedi. Eger qorǵa qarjy aýdarylyp, keiin aýdarǵan adam belgili sebeppen aqshasyn qaitaryp alǵysy kelse, problema joq. Qarjy iesine qaitarylady. Al eger jeke tulǵa nemese uiym óz erkimen qaiyrymdylyq jasasa, onda másele joq. Biz erkinen tys qaiyrymdylyq jasaýǵa qarsymyz. Bireýden qinap aqsha jinalmaýyn talap etemiz. Bul - aqylǵa syimaityn jait. Jeke óz basym, qor basshysy retinde de eriksiz qarjy jinaýǵa qarsymyn», - dedi Bolat Jámishev «Oshakbaev LIVE» telebaǵdarlamasynyń efirinde.
Sondai-aq, atalǵan telebaǵdarlamanyń qonaǵy bolǵan QR Parlamenti Májilisiniń depýtaty, «Qazaqstan halqyna» qory qamqorshylyq keńesiniń múshesi Irina Smirnova qaiyrymdylyq jasaýǵa qatysty óz pikirin bildirdi.
«Men halyqtan qarjy jinaýǵa qarsymyn. Maǵan mektep kezinen bastap aqsha jinaý degen unamaityn. Qarapaiym adamdardan aqsha jinaý qordyń jumysyna abyroi bermeidi. Memleket basshysy qor jumysyna qatysty naqty aityp ótti, baiyp, masaiǵan adamdardyń halyqqa kómek kórsetetin ýaqyty keldi dedi. Qorǵa qarjyny erkinen tys aýdartyp jatyr degen shaǵym da túsip jatyr. Men májbúrleýge qarsymyn. Qor jumysy aiaqqa basyp, el igiligin kóre bastaǵanda qaiyrymdylyq kórsetkisi kelgen jandar ózderi-aq túsinedi. Sondyqtan bireýdi qinaýdyń qajeti joq. Eriksiz aýdarylǵan qarjyny qaitaryp berý kerek», - deidi ol.
