قايىرىمدىلىق جاساپ, قورعا اۋدارعان اقشانى كەرٸ قايتارىپ الۋ مٷمكٸندٸگٸ بار ما? بۇل سۇراققا «قازاقستان حالقىنا» قورىنىڭ تٶراعاسى بولات جەمٸشەۆ جاۋاپ بەردٸ, دەپ حابارلايدى قازاقپارات.
«قوردىڭ بيۋدجەتٸن قامقورشىلىق كەڭەس بەكٸتەدٸ. ەگەر قورعا قارجى اۋدارىلىپ, كەيٸن اۋدارعان ادام بەلگٸلٸ سەبەپپەن اقشاسىن قايتارىپ العىسى كەلسە, پروبلەما جوق. قارجى يەسٸنە قايتارىلادى. ال ەگەر جەكە تۇلعا نەمەسە ۇيىم ٶز ەركٸمەن قايىرىمدىلىق جاساسا, وندا مەسەلە جوق. بٸز ەركٸنەن تىس قايىرىمدىلىق جاساۋعا قارسىمىز. بٸرەۋدەن قيناپ اقشا جينالماۋىن تالاپ ەتەمٸز. بۇل - اقىلعا سىيمايتىن جايت. جەكە ٶز باسىم, قور باسشىسى رەتٸندە دە ەرٸكسٸز قارجى جيناۋعا قارسىمىن», - دەدٸ بولات جەمٸشەۆ «وشاكباەۆ LIVE» تەلەباعدارلاماسىنىڭ ەفيرٸندە.
سونداي-اق, اتالعان تەلەباعدارلامانىڭ قوناعى بولعان قر پارلامەنتٸ مەجٸلٸسٸنٸڭ دەپۋتاتى, «قازاقستان حالقىنا» قورى قامقورشىلىق كەڭەسٸنٸڭ مٷشەسٸ يرينا سميرنوۆا قايىرىمدىلىق جاساۋعا قاتىستى ٶز پٸكٸرٸن بٸلدٸردٸ.
«مەن حالىقتان قارجى جيناۋعا قارسىمىن. ماعان مەكتەپ كەزٸنەن باستاپ اقشا جيناۋ دەگەن ۇنامايتىن. قاراپايىم ادامداردان اقشا جيناۋ قوردىڭ جۇمىسىنا ابىروي بەرمەيدٸ. مەملەكەت باسشىسى قور جۇمىسىنا قاتىستى ناقتى ايتىپ ٶتتٸ, بايىپ, ماسايعان ادامداردىڭ حالىققا كٶمەك كٶرسەتەتٸن ۋاقىتى كەلدٸ دەدٸ. قورعا قارجىنى ەركٸنەن تىس اۋدارتىپ جاتىر دەگەن شاعىم دا تٷسٸپ جاتىر. مەن مەجبٷرلەۋگە قارسىمىن. قور جۇمىسى اياققا باسىپ, ەل يگٸلٸگٸن كٶرە باستاعاندا قايىرىمدىلىق كٶرسەتكٸسٸ كەلگەن جاندار ٶزدەرٸ-اق تٷسٸنەدٸ. سوندىقتان بٸرەۋدٸ قيناۋدىڭ قاجەتٸ جوق. ەرٸكسٸز اۋدارىلعان قارجىنى قايتارىپ بەرۋ كەرەك», - دەيدٸ ول.
