Qazaqstan halal ónimderin sertifikattaýdy júrgizý quqyǵy ie boldy. Mundai ruqsat Birikken Arab Ámirlikteriniń halyqaralyq akkreditteý ortalyǵynan alyndy, dep habarlaidy QazAqparat.
QR Premer-Ministriniń orynbasary - Saýda jáne integratsiia ministri Baqyt Sultanovtyń aitýynsha, búgin Birikken Arab Ámirlikteriniń halyqaralyq akkreditteý ortalyǵy QazStandart zerthanasyn akkreditteý týraly resmi qujat berdi. QazStandart zerthanasy, sondai-aq halal ónimderin sertifikattaý quqyǵyna ie boldy.
«El ishinde Halal halyqaralyq sertifikatyn alý múmkindigi eksportty arttyrýǵa yntalandyrady dep senemin. Eger qazir kásiporyndar halal sertifikatyn alý úshin (importtaýshy elde) bir partiiaǵa 7 myńnan 30 myń dollarǵa deiin jumsasa, Qazaqstandaǵy sertifikattaý quny seriialyq óndiriske 700 myń teńgeden (1,5 myń dollar) bastalady. Bul zerthananyń sertifikattaý nátijeleri Parsy shyǵanaǵyndaǵy barlyq arab memleketteriniń (Bahrein, Katar, Kýveit, BAÁ, Oman, Saýd Arabiiasy) aýmaǵynda moiyndalady. Sonymen qatar eksport kólemin basqa aimaqtarǵa, máselen Iran, TMD, Túrkiia jáne basqa elderge ulǵaita alamyz», - dep jazdy Baqyt Sultanov Facebook-paraqshasynda.
Vitse-premerdiń dereginshe, Qazaqstanda tamaq ónimderi, toqyma, farmatsevtika, turmystyq himiia jáne kosmetika syndy halal ónimder shyǵaratyn 4 200-den astam óndirýshi bar.
«Aitpaqshy, zerthanamyz EAEO pen Ortalyq Aziiadaǵy halyqaralyq talaptar boiynsha akkredittelgen jalǵyz zerthana sanalady. Demek biz halal boiynsha óńirlik habqa ainalýdamyz. Aziia, EAEO jáne TMD elderiniń kásipkerleri óz ónimderiniń sáikestigin baǵalaý jáne Parsy shyǵanaǵy elderiniń naryǵyna shyǵý úshin bizdiń zerthanany paidalana alady», - dedi B.Sultanov.
Budan bólek, onyń málimetinshe, Qazaqstanda eksport kólemin ulǵaitý boiynsha jumystar atqarylyp jatyr.
«2025 jylǵa qarai shikizattyq emes eksport kólemin 41 mlrd dollarǵa jetkizýdi kózdeimiz. Jyldyń alǵashqy úsh aiynda birqatar negizgi saýda seriktesimizben taýar ainalymyn edáýir ulǵaittyq. Eýroodaq elderimen ózara saýda kólemi ótken jyldyń qańtar-naýryzymen salystyrǵanda shamamen 55,2 paiyzǵa ósti. AQSh-pen - 35,6, Qytaimen - 25,1 paiyz. Ósim shikizat jáne óńdelgen taýarlarda da baiqalady», - dedi Úkimet basshysynyń orynbasary - Saýda jáne integratsiia ministri.
