Qazaqstan kemeleri Ob ózenimen Hanty-Mansiisk okrýgine deiin shyǵýǵa múmkindik alady. Bul týraly QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
Senattyń jalpy otyrysynda «Keme qatynasy týraly kelisimdi ratifikatsiialaý týraly» QR Zańy boiynsha baiandama jasaǵan onyń aitýynsha, atalǵan qujatta ekijaqty tasymaldardy habarlama tártibine aýystyrý belgilengen. Jyl saiyn, 1 sáýirge deiin ýákiletti organdar ekijaqty tasymaldardy júzege asyratyn kemelerdiń aldyn ala tizimderin kelisetin bolady. Qajet bolǵan jaǵdaida jyl ishinde bul tizimge ózgeris engizý múmkindigi qaralǵan.
«Bul rette kelisim qabyldanǵannan keiin qazaqstandyq tasymaldaýshylar ózen tasymaldaryn Ertis basseini sheginde ǵana emes, Ob ózenimen Hanty-Mansiisk okrýgine deiin shyǵýǵa múmkindik alady. Sondai-aq Atyraý, Astrahan, Volgograd porttary arasyndaǵy ekijaqty tasymaldardy jańartý máselesi de qarastyrylǵan. 2025 jylǵa qarai ózen tasymaldarynyń kólemin «Nurly jol» baǵdarlamasy boiynsha 3,8 mln tonnaǵa deiin jetkizýdi josparlap otyrmyz», - dedi Berik Kamaliev.
Vitse-ministr kelisim taraptardyń porttar qyzmetterine teń jaǵdailar jasaýyn, sondai-aq keme jáne ekipaj músheleriniń qujattaryn ózara tanýdy kózdeitindigin aitty.
«Bul baqylaýshy organdardyń kemelerdi qarap-tekserý rásimderin jeńildetýge múmkindik beredi. Kelisimdi iske asyrý aiasynda taraptar ekipaj quramyna qoiylatyn talaptardy belgileý boiynsha jeke vedomstvoaralyq shart qabyldaýdy josparlaýda», - dedi ol.
