Toqaev úkimeti bilikte otyrǵaly jylǵa jýyqtady. Saiasi reforma jasalmady, jasalmaityn da shyǵar. Ulttyq senim keńesinde aitylǵan 5 ózgeris týraly naqty sheshim joq. Saiasi ǵana emes, ekonomika salasynda da eshbir reforma qolǵa alynbady. Eldiń investitsiialyq ahýaly jaqsarmady. Úkimettiń qazirgi jasap jatqan qadamynyń bári reformadan góri shaǵyn jáne orta bizneske, halyqqa jaǵymsýǵa kóbirek uqsaidy. ShOB tekserýge moratorii, salyq raqymshylyǵy - jaqsy, biraq ol jaǵdaidy túbegeili ózgertýge bet burǵan qadam emes. Áleýmettik saiasattyń ózgerýi, jaǵdaiy tómen otbasylarǵa járdemaqy berý de burynǵy jibergen qatelikterdiń ótemi ǵana.
Qazaqstan Qajygeldin tusynda jasalǵan naryq reformalarynyń ekpinimen áli keledi. 1997 jylǵy Qazaqstan-2030 baǵdarlamasynyń negizgi bir ustanymy ekonomikany ártaraptandyrý edi. Osy baǵdarlamany iske asyrý úshin ár Úkimet ózinshe joba jasady, naqty indikatorlardy jazdy, biýdjetten milliardtar bólindi. Biraq, onyń nátijesi óte az. Nege? Óitkeni, ol jobalar kóp aqsha jumsap, az nátijege jetetin, ǵylymsyz jasalǵan ekstensivti dúnieler. Toqaev Joldaýynda "qarapaiym zattardyń ekonomikasy" degen ádemi termin aitty. Biraq Úkimet eń quryǵanda sol baǵytty damytýǵa kóńil bólmei otyr. Byltyrǵy 1 sáýirden bastalǵan, biyl qańtarda basqa arnaǵa túsken járdemaqy institýty dál sol qarapaiym zattar ekonomikasyn damytýǵa yqpal etetin tetik bolýy tiis edi. Biraq ony oryndatyp jatqan Toqaev joq, oryndaiyn deitin Mámin kórinbeidi.
Bolat Múrsálimniń feisbýktaǵy jazbasynan
