Qorǵanys jáne aeroǵarysh ónerkásibi ministri Beibit Atamqulov adamnyń bet-álpetin tanityn júie týraly aityp berdi. Bul júieni Qazaqstannyń mamandary jasap jatyr, dep habarlaidy QazAqparat tilshisi.
«Ótken jyly biz osy joba boiynsha jumystardy bastap, bul baǵdarlama boiynsha ulttyq ǵylymi keńesten óttik. Ókinishke qarai, QR Bilim jáne ǵylym ministrligi janyndaǵy Joǵary ǵylymi-tehnikalyq komissiiada bizdiń ázirlemeler qarjylandyrýǵa ótpei qaldy. Sondyqtan da zańnamanyń qabyldanýyn kútip otyrmyz. Bul, qupiialyǵy bar ázirleme bolǵandyqtan, olardy sheteldik sarapshylardyń talqylaýyna bere almaimyz», - dedi vedomstvo basshysy Májilistegi Úkimet saǵatynda.
Ministrdiń atap ótýinshe, aldaǵy jyldan bastap bul jobany qarjylandyrý bastalýy múmkin.
«Jumystar alǵa jyljyp jatyr, alaida qarjylandyrý máselelerine bailanysty birshama tejelip qaldy», - dep qosty vedomstvo basshysy.
Sonymen qatar, ol jobany iske qosý úshin qajetti qarjy kólemin jariialaýdan bas tartty.
«Men bul málimetti aita almaimyn, sebebi bul joba jappai jariialaýǵa jatpaidy. Atap aitqanda, bet-álpetti tanýdyń otandyq ázirlemesi. Ony «Aqyldy qala» sekildi júiege paidalanýǵa bolady», - dedi Beibit Atamqulov.
