Qazaqstan keńestik áskeri tehnikalaryn jańǵyrtyp, syrtqy naryqta satýdy josparlap otyr. Bul týraly búgin QR Parlamenti Májilisinde «Qorǵanys ónerkásibi jne memlekettik qorǵanystyq tapsyrys týraly» zań jobasyn tanystyrǵan elimizdiń Qorǵanys jáne aeroǵarysh ónerkásibi ministri Beibit Atamqulov aitty, dep habarlaidy "Ult aqparat" QazAqparat agenttigine silteme jasap.
Onyń aitýynsha, atalǵan zań jobasynda paidalanylmaityn áskeri múlikterdi Qorǵanys jáne aeroǵarysh ónerkásibi ministrliginiń qaraýyna berý usynylyp otyr. Buǵan qosa, zań jobasynda paidalanylmaityn qarý-jaraqtar men áskeri tehnikalardy otandyq qorǵanys-ónerkásip kesheni uiymdarynda jóndep, eksportqa shyǵarý shartymen satý kózdelgen.
«Biz paidalanylmaityn múlikterdi qaraýyna berý quqyǵyn eki kezeńmen júzege asyrý usynylady. Birinshi kezeńde «QR Qorǵanys jáne Qarýly kúshteri týraly» zańǵa ózgerteýler engizý jolymen eń aldymen ministrlikke paidalanylmaityn áskeri múlikterge bilik etý quziretin bekitý usynylady. Ekinshi kezeń Respýblikalyq biýdjettik komissiia sharttaryn maquldaǵan jaǵdaida respýblikalyq biýdjetten qarjy qarajaty bólingen jaǵdaida áskeri bólimderdiń aýmaǵyn saqtalyp turǵan múlikterden bosatý protsedýrasyn qamtidy», - dedi ministr.
Beibit Atamqulovtyń sózine qaraǵanda, Qazaqstanda sonaý keńestik zamannan qalǵan eski áskeri tehnikalar áskeri bólimderdiń qoimalarynda tur. Sondyqtan atalǵan tehnikalardy jóndep, jańǵyrtyp, eksportqa shyǵaryp satý kózdelýde. Al satylmai qalǵan áskeri múlikter joiylatyn bolady.
«Bul sharalar eldiń ishinde qarý-jaraqtyń kóleńkeli ainalymyn boldyrmaý úshin usynylyp otyr», - dedi ol.
