Ýkrainadaǵy jaǵdaiǵa bailanysty qazaqstandyqtardy qaýipsiz jerge kóshirý sharalary bastaldy. Alaida evakýatsiialaýǵa qatysty túrli aqparat taralyp jatyr. Tipti, "elge oralý úshin aqsha suraidy" degen aqparat ta bar.
Sputnik Qazaqstan tilshisine suhbat bergen Qazaqstannyń Ýkrainadaǵy elshisi Darhan Qaletaev evakýatsiianyń qiyndyqtary týraly aityp berdi.
Mobilizatsiia bastaldy
Elshiniń aitýynsha, búginde halyqty tasymaldaýǵa adam jetispei jatyr. Sebebi Ýkrainada jalpy mobilizatsiia jariialandy. Kólik júrgizýshileri de armiiaǵa shaqyrylyp jatyr.
"Kólik múldem joq, kólik bolǵanda ony júrgizetin adam joq. Kólik kompaniialary avtobýstyń róline otyrǵyzatyn adam tappai jatyr. Óitkeni bul jaqta barlyq er adamdy mobilizatsiialaýǵa kiristi. Men elshiliktegi kólikterdiń bárin evakýatsiialaý jumysyna tarttym. Bir saǵat buryn 100 adamdy jiberdik. Barlyq kólikke otyrǵyzdyq. Men ózim kóliksiz qaldym", - dedi Qaletaev.
Onyń aitýynsha, Ýkrainada júrgen qazaqstandyqtardyń sany kóp bolyp shyqty. Nur-Sultan ýaqytymen saǵat 10:00-ge deiin evakýatsiiaǵa 486 Qazaqstan azamaty ótinish bergen. Barlyǵyn elge qaitarý úshin, kem degende, úsh áýe reisin jasaýǵa týra keledi.
Degenmen, adamdardyń sany taǵy ósýi múmkin.
"Shamamen, 500 adam dep otyrmyz. Biraq onymen toqtamaityn siiaqty. Bul - tańǵy saǵat altydaǵy málimet", - dep atap kórsetti Qaletaev.
Esepke turmaǵandar shyǵa bastady
Qazirgi kezde elshiliktiń esebinde, shamamen, 500 Qazaqstan azamaty bar. Olardyń ishinde diplomattar jáne Ýkrainaǵa jumys isteý úshin kelgender bar. Biraq esepke turmaǵan adamdar da joq emes.
"Bizde turaqty esep bar. Bireýler otbasyn qurdy. Olardyń sany, shamamen, 1 100 adamdy quraidy. Otbasy bolǵannan keiin tirkeýge turmai, júre beredi", - deidi Qaletaev.
Qazirgi kezde tirkeýge turmaǵan qazaqstandyqtar da evakýatsiialaýdy surap otyr.
"Terezeniń aldynda bomba jarylsa, birden qaýipsiz jer izdeisiń ǵoi. Qazir sol adamdardyń bári qaýipsiz jerge kóshirýdi talap etip otyr. Talaptary zańdy. Ony oryndaý qajet", - dedi Qaletaev.
Elshiniń ózi ázirshe Ýkrainadan ketpeimin deidi. Onymen birge taǵy tórt qyzmetker qaldy. Barlyǵy jer astyndaǵy bólmelerde jumys isteidi. Al daladaǵy atys basylǵanda syrtqa shyǵady.
Qazaqstandyqtardyń shyǵyny óteledi
Darhan Qaletaevtyń aitýynsha, Ýkrainadan evakýatsiialyq reistermen shyǵyp jatqan qazaqstandyqtardyń biletke jumsaǵan aqshasy qaitarylady.
"Qazirgi kezde bul máseleni úkimet qarap jatyr. Biz tiisti sheshimdi kútip otyrmyz. Air Astana da habardar. Úkimet áýe kompaniiasynyń shyǵyndaryn óteý jaǵyn qarastyryp jatyr", - dedi Qaletaev.
Ýkrainada júrgen qazaqstandyqtardy aldymen Polshanyń Katovitse qalasyna jetkizeldi. Sol jerden arnaiy reispen Atyraýǵa ushady.
Air Astana reisi 26 aqpanda jergilikti ýaqytpen saǵat 02:00-de ushyp shyǵady.
