QR azamattaryn Ýkrainadan evakýatsiialaý bastalǵaly beri Qazaqstannyń shet elderdegi mekemeleri 553 azamattyń shyǵýyna kómek kórsetti, dep habarlaidy QazAqparat.
Onyń ishinde:
- Polshaǵa – 526 adam;
- Moldovaǵa – 21 adam. Moldovadan Rýmyniiaǵa 9 adam shyqty, onyń ishinde 7 adam Qazaqstanǵa ushyp ketti, 2 azamat Býharesttegi QR Elshiligimen qonaq úige ornalastyryldy;
- Majarstanǵa – 5 adam;
- Slovakiiaǵa – 1 adam.
Búgingi tańda «Air Astana» áýe kompaniiasynyń úsh evakýatsiialyq ushaqtarymen Qazaqstanǵa 432 adam qaitaryldy.
Qazir tórtinshi evakýatsiialyq ushaqty jiberý boiynsha jumys júrgizilýde. Reis Katovitse qalasynda (Polsha) azamattardyń qajetti sanynyń jinalýyna qarai júzege asyrylady.
Qazaqstandyq diplomattar joǵaryda atalǵan memleketterdiń shekarasynan ótýdi, azamattardy jinaýdy jáne ornalastyrýdy, sondai-aq Qazaqstanǵa odan ári jóneltýdi qamtamasyz etýde. Aita ketetin jáit, osyǵan deiin Ýkrainadan shyqqan birqatar otandastar Eýropalyq Odaq aýmaǵynda qalýǵa sheshim qabyldady.
Qazirgi ýaqytta Katovitse qalasynda 30 QR azamaty bar, Ýkraina-Polsha shekarasynda 30 jolaýshysy bar taǵy 1 avtobýs óz kezegin kútýde. Lvovtaǵy QR Qurmetti konsýldyqtyń janyndaǵy evakýatsiialyq jinaý núktesinde 9 adam, Kievtegi QR Elshiliginde – 10 adam, Harkovta – 7 adam bar. Kievtegi QR Elshiligi shtattyq rejimde jumysyn jalǵastyrýda.
«Atameken» UKP aqparatyna sáikes, Ýkrainadaǵy áskeri áreketter bastalǵannan keiin sol eldiń aýmaǵynda 47 júrgizýshi – QR azamattary jáne 8 júrgizýshi – shet memleketterdiń azamattary bar jalpy 55 birlik avtokólik qalyp qaldy.
Qazirgi ýaqytta QR shet elderdegi mekemeleriniń tikelei kómegimen jáne aralasýymen 55 avtokólik quraldarynyń 31-i shyqty, onyń ishinde:
- Reseige – 11;
- Moldovaǵa – 8;
- Polshaǵa – 12.
Qalǵan 24 avtokólik Ýkraina aýmaǵynda qalyp qoidy.
QR SIM júrgizýshilermen bailanys ornatqan, olardyń tizimderi ózektendirildi, avtokóliktiń ornalasqan jeri naqtylandy. Júk tasymaldaýshylardyń turǵan jerine bailanysty QR tiisti sheteldik mekemelerine avtokólik quraldaryn evakýatsiialaý boiynsha tapsyrmalar berildi. Osy baǵyttaǵy jumys jalǵasýda.
