Altyn ordanyń Qazaqstan úshin mańyzy qandai? Bul suraqqa Álemdik ekonomika jáne saiasat institýtynyń «Ishki saiasi, gýmanitarlyq jáne media zertteýler» baǵdarlamasynyń bas sarapshysy Radik Temirǵaliev taldaý jasai otyryp, jaýap berdi, dep habarlaidy QazAqparat.
«Altyn orda Qazaqstanǵa nesimen mańyzdy? Birinshiden, tarihtyń mańyzdy bóliginiń kóleńkede qalyp qoiýy – bizdiń tarihty tutastyǵynan aiyrady. Bylaisha aitqanda, ata-babamyzdyń eki ǵasyrlyq tarihyn shetke ysyryp, Qarahan áýletinen nemese Qypshaq handyǵynan birden Qazaq handyǵyna sekirip túse almaimyz. Iaǵni, olai etý Qytai tarihyn Tań dinastiiasynsyz nemese Reseidi Riýrikovich kezeńinen bólip qarastyrýmen birdei. Bulai etsek, tarih logikasy qurdymǵa ketip, tarihi protsestegi bailanysty úzip alamyz», - dedi Radik Temirǵaliev elordada ótken «Altyn orda. Tarih pen taǵylym» atty dóńgelek ústelde.
Sarapshy Altyn ordanyń tarihyn tolyǵymen zerttep almai, Qazaq handyǵyn taný múmkin emes ekenin aitty.
«Ekinshiden, qazaqstandyq qoǵam Altyn ordasyz óziniń simvolikalyq kapitalynyń mańyzdy bóligin joǵaltyp alady. Ártúrli zertteý jumystary qoǵam men jeke tulǵanyń damýyna qanshalyqty áser etkenin, psihologiialyq yqpaly bolatynyn dáleldegen. Qysqasha aitqanda, myǵym ári ekonomikasy damyǵan, mádenieti bai, áskeri-saiasi derjavanyń negizin qalaǵan babalarymyzdyń úlgisi qazirgi qoǵamnyń ambitsiiasyna qoǵamdyq áserin tigizedi. Ózińe degen senim joq bolsa, eshqandai asýdy ala almaitynyńyz anyq. Bul rette Altyn ordanyń tarihy halyqtyń rýhyn jańǵyrtyp, qazaq patriotizmin bekemdeýde mańyzdy ról atqarady», - dedi Radik Temirǵaliev.
Tarihshynyń sózinshe, Qazaqstan Altyn ordanyń qandai da bir murasyn jekeshelendirip alýdy oilap otyrǵan joq.
«Bul – túrki halyqtarynyń ortaq murasy. Atalǵan tarihi kezeńdi zertteýde Tatarstan ǵalymdarynyń qanshalyqty úles qosqanyn bilemiz. Bir-birimizben etene jumys júrgizýdiń arqasynda ǵana biz Altyn ordaǵa álemdik tarihta laiyqty oryn bere alamyz», - deidi sarapshy.
Eske sala ketsek, búgin elordada «Altyn orda. Tarih pen taǵylym» atty dóńgelek ústeli ótip, Altyn orda tarihyna qatysty tatarstandyq tarih ǵylymynyń doktory, etnograf Damir Iskakov, Túrki akademiiasynyń sarapshysy, filologiia ǵylymdarynyń kandidaty Timýr Kozyrev, tarih ǵylymynyń doktory, QR BǴM Memleket tarihy institýtynyń direktory Búrkit Aiaǵan pikir bildirgen edi.
