Ónerkásip jáne qurylys ministri Ersaiyn Naǵaspaev Memleket basshysy Qasym-Jomart Toqaevtyń jer qoinaýyn zertteý deńgeiin arttyrý jónindegi tapsyrmasynyń oryndalý barysyn tekserý maqsatynda Ulytaý oblysyna jumys saparymen bardy, dep habarlaidy Ult.kz.
Qazirgi ýaqytta elimizdiń 11 óńirindegi 20 ýchaskede 1:50 000 masshtabyndaǵy geologiialyq túsirilim (GT-50) jumystary júrgizilýde. Zertteýmen qamtylǵan jalpy aýmaq 100 myń sharshy shaqyrymnan asady. Onyń ishinde Ulytaý oblysyndaǵy 7 ýchaskege tiesili 36 myń sharshy shaqyrym jerde keshendi barlaý is-sharalary atqarylyp jatyr.
Jer qoinaýyn memlekettik geologiialyq zertteý (JQMGZ) baǵdarlamasy aiasynda «Ulttyq geologiialyq qyzmet» AQ úilestirýimen arnaiy geologiialyq barlaý kompaniialarynyń toby quryldy. Jobaǵa qatysýshy «Kazakhmys Barlau» JShS Ulytaý oblysynda zamanaýi aerogeofizikalyq zertteýler júrgizse, «Taý-Ken Samuryq» quramyndaǵy «Qazgeologiia» AQ RTK-navigatsiiasy bar ushqyshsyz apparattardy qoldanýda. Sonymen qatar Ulytaý jáne Abai oblystarynda 300-ge jýyq uńǵyma burǵylandy.
Sapar barysynda ministrge Jerdi qashyqtan zondtaý, Ionic Leach joǵary dáldiktegi geohimiialyq ádisi jáne ushqyshsyz keshender siiaqty ozyq tehnologiialardy engizý nátijeleri tanystyryldy.
«Jer qoinaýyn keń aýqymda zertteý – Memleket basshysy qoiǵan basty strategilyq mindet. Bizdiń maqsatymyz – sapaly geologiialyq derekter alý. Bul salaǵa investitsiia tartyp, ónerkásipti damytýǵa tikelei yqpal etedi», – dep atap ótti Ersaiyn Naǵaspaev.
Qazirgi tańda árbir perspektivti ýchaskege elektrondy pasport daiyndalyp, Jer qoinaýynyń biryńǵai tsifrlyq kadastry qalyptastyrylýda. Daiyn bolǵan alǵashqy ýchaskelerdi investorlar úshin 2027 jyldan bastap aýktsionǵa shyǵarý josparlanǵan.
Sondai-aq ministr Ortalyq Aziiadaǵy eń iri ǵylymi-óndiristik keshenderdiń biri sanalatyn Geologiialyq klasterdiń jumysymen tanysyp, sapar sońynda tiisti tapsyrmalar berdi.
