Jer reformasy jónindegi komissiia jumysy aiaqtaldy. Alaida, qazaq jerin ata-babasynan qalǵan muradai qalaýynsha bilep-tóstegen sheteldik Shýmaherdiń shýy tolastar emes.
Germaniia azamaty – Shýmaherdiń Aqmola oblysy aýmaǵynan 34 myń gektar jerdi iemdenip qana qoimai, sol mańdaǵy aýyl qazaǵyn «jylqy urlaidy» dep dálel-aiǵaqsyz ury atandyrǵany qai qazaqty bolmasyn ashyndyratyny haq.
Mine, endi aidyń-kúnniń amanynda naqaqtan «ury» atanyp shyǵa kelgen Aqmola oblysy, Qorǵaljyn aýdany, Órkendeý aýylynyń turǵyndary ózderin Shýmaherge basyndyryp qoia almaityndaryn aityp, bas prokýratýraǵa aryz jazypty (sýrette).
Sýrette: 47 adam qol qoiǵan Órkendaý aýyly turǵyndarynyń nemis kásipkeri Robert Shýmaherdiń ústinen bas prokýratýraǵa jazǵan aryzdary
Videoda: Aqmola oblysy, Qorǵaljyn aýdany, Órkendeý aýylynyń turǵyndarynyń Shýmaher týraly aitqandary
«ShÝMAHER ATA-BABAMYZDYŃ SÚIEGIN QORLADY»
Sýrette: Órkendeý aýylynyń turǵyndary
Shýmaher qazaq jeriniń bir pushpaǵy - 34 myń gektar jerge qojalyq etip qana qoimai, jerdiń ainalasynan uzyndyǵy bir metr, tereńdigi bir jarym metr ura qazyp tastaǵan.
«Ura qazý kezinde tehnika molalardy kúrep ketti. Adam súiekteri tabyldy. Ol bizdiń ata-babamyzdyń súiegi. «Ura qazýdy toqtatyńdar!» degen bizdiń sózimizge eshkim qulaq aspady. Robert Shýmaher osyndai adamdyqqa shet áreketimen ata-babamyzdy qorlady» dep zarlap otyr Órkendeý aýylynyń turǵyndary. Bul az deseńiz, jýyqta Shýmaherdiń ókilderi kelip, shý bolǵan máseleni jýrnalistterge túsindirmekke talpynyp, Shýmaherge shań jýytpai ketken edi. Sonda zańger Strýchkov: «Ol jerge jylqy ósiriledi. Jergilikti turǵyndarǵa mal ósirgennen góri «Aq Qulynnyń» malyn urlaý jeńil edi. Mal urlyǵyn boldyrmaý úshin or qazylǵan edi» degen bolatyn. Al, aýyl aqsaqaldary Strýchkovtyń aitqandary tap-taza jala, urlyq týraly jergilik IIB da birde bir aryz joq, is qozǵalyp kórmegenin aitady.
Sheteldiktiń qazaqtyń jerin alyp, ata-babasynyń súiegin kúrep, qorlap, onymen qoimai sol mańdaǵy qazaqty ury atandyrǵanyn jergilikti bilik nege kórmei otyr? Nege áreket etpeidi?
QORǴALJYN AÝDANYNYŃ ÁKIMI PREZIDENT JARLYǴYNA PYSQYRMAI MA?
Jer reformasy jónindegi komissiia jumysy júrip jatqan tusta baspsaózde kóterilgen Shýmaherdiń isi jurt nazaryna túsip, qyzý talqylanǵan. Sodan keiin «jalmaýyzǵa da jan kerek» degendei, Shýmaherdiń ókilderi zańger Strýchkov, Esmaǵambetov jáne Qorǵaljyn aýdanynyń ákimi Qaiyr Ryskeldinov Shýmaherdiń ieligindegi jer tirkelgen «Aq-Qulyn» JShS-nyń direktory Shaihan Qasymbaevqa qysym jasap, 49 jylǵa berilgen jerdi 10 jylǵa, 20 jylǵa berilgen jerdi de 10 jylǵa, iaǵni, jalǵa alý merzimin dereý qysqartyp, kelisimshartty qaita qaraý jóninde ótinish jazdyrǵan. Bul ótinish bir kúnniń ishinde qanaǵattandyrylyp, barlyq qujat rásimdeý máseleleri bir-aq kúnniń ishinde sheshilgen. Astyn syzyp aitatyn nárse mynaý: Qorǵaljyn aýdany ákimi men nemis kásipkeriniń ókilderi bul isti QR Prezidentiniń «Jer kodeksiniń keibir baptaryna 2016 jyldyń 31 jeltoqsanyna deiin moratorii jariialaý» týraly 06.05.2016 qol qoiylǵan №284 jarlyǵy jariialanǵannan keiin iske asyrǵan. Prezident jarlyǵyn buzý – zańǵa baǵynbaý! Jarlyqqa pysqyrmaý – Prezidentke onyń jarlyqtaryna moiynusynbaý! Osylaisha, Qorǵaljyn aýdany ákimi jarlyqqa pysqyrmai, ózin qazaq jeriniń qojaiyny sezinip, Shýmaherdiń shashbaýyn kóterip júr.
Qysym jasalǵan soń, amalsyz Prezident N.Nazarbaevtyń jarlyǵyna qaishy, zańsyz áreketke barǵan «Aq-Qulyn» JShS-nyń direktory Shaihan Qasymbaev basyn arashalaý úshin bas prokýratýraǵa aryz jazǵan. Onda Qasymbaev barlyq jaǵdaidy jaza kelip, bas prokýratýradan Aqmola oblysy, Qorǵaljyn aýdany ákimi Qaiyr Ryskeldinov pen Shýmaherdiń ókilderi Strýchkov, Esmaǵambetovterdiń áreketteriniń zańdylyǵyn tekserip, jaýapqa tartýdy suraidy (sýrette).
"Aq-Qulyn" JShS-nyń direktory Shaihan Qasymbaevtyń Aqmola oblysy, Qorǵaljyn aýdanynyń ákimi Qaiyr Ryskeldinov jáne Robert Shýmaherdiń ókilderi Strýchkov, Esmaǵambetovtardyń ústinen bas prokýratýraǵa jazǵan aryzy
Ákim aralasqan istiń mundai asqan shapshańdyqpen bitkenine tań qalǵan Órkendeý aýylynyń turǵyndary «jer týraly kelisimge kishkene ǵana ózgeris engizýge jergilikti jurt on jyldap júredi», al Shýmaherge kelgende bir-aq kún jetedi eken deidi.
Mine, osyndai óreskel zańsyzdyqtar men ata-babany, onyń urpaǵyna mura etip qaldyrǵan jerin qorlaǵandardyń áreketine tekseris jasap, toqtam salýdy suraǵan Órleý aýylynyń 47 turǵyndary qol qoiyp, bas prokýratýraǵa arnaiy aryz jazdy.
Biz bul máseleni nazardai ustaityn bolamyz.
Nura Matai
Abai.kz
