Elordada memlekettik tilge dýbliajdalǵan «Muzdy ólke-2» filminiń aldyn ala kórsetilimi ótti. Bul – «Ózińnen basta» jobasy aiasynda qazaq tiline aýdarylǵan 33-shi gollivýdtyq ónim. Joba 2011 jyldan bastap «Bolashaq» korporativtik qory jáne «Meloman» kompaniiasynyń bastamasymen júzege asyrylyp keledi, – dep habarlaidy «Ult aqparat».
«Bolashaq» korporativtik qory qamqorshylyq keńesiniń qurmetti múshesi Baýyrjan Baibek Tuńǵysh Prezident Nursultan Nazarbaevtyń bastamasymen qolǵa alynǵan «Bolashaq» baǵdarlamasynyń arqasynda qazaqstandyq myńdaǵan jasqa álemniń eń ozyq oqý oryndarynda sapaly bilim alýǵa múmkindik berilgenin tilge tiek etti. 2011 jyly baǵdarlama túlekteri arnaiy qor qurdy. Qor balalarǵa arnalǵan qaiyrymdylyq jáne bilim berý jobalarynan bólek, memlekettik tildi nasihattaýdy da óz mindetine alǵan-dy.
«8 jyl ishinde el bolashaǵyna beijai qaramaityn demeýshiler men qamqor jandardyń arqasynda, balalarymyzǵa arnalǵan 33-shi gollivýdtyq filmdi memlekettik tilge aýdardyq. 2011 jyly joba alǵash iske qosylǵan kezde elimizdiń Tuńǵysh Prezidenti Nursultan Nazarbaev bul isimizdi qoldady. Elbasy jańa mazmun arqyly qazaq tilin damytýǵa jaǵdai jasaýdyń mańyzdylyǵyna toqtalǵan bolatyn. Bul týraly Memleket basshysy Qasym-Jomart Toqaev ta aitty. Sondyqtan, bir ai buryn ǵana «Nur Otan» partiiasy tarapynan memlekettik tildi nasihattaýdyń tiimdi tetikterin ázirleý úshin arnaiy top qurdyq. Osy oraida, «Ózińnen basta» jobasynyń barlyq qatysýshysyna alǵysymdy bildiremin. Filmderdi aǵylshyn tilinen qazaq tiline dýbliajdaý kezinde bizdiń aýdarmashylarymyz qazaq ádebieti klassikteriniń shyǵarmalarynan úzindiler keltiredi. Bul filmde Abaidyń «Kúz» jáne «Ǵashyqtyń tili tilsiz» óleńderin tyńdai alasyzdar. Olai bolsa, ataqty gollivýdtyq filmdi ana tilimizde tamashalaýǵa barsha qazaqstandyqtardy shaqyramyn», - dedi Baýyrjan Baibek.
«Bolashaq» qamqorshylyq keńesiniń tóraiymy Dinara Shaijúnisovanyń aitýynsha, erik-jigeri muqalmaǵan eki qyzdyń ómiri týraly baiandaityn bul kartinanyń taqyryby bizdiń elimiz úshin de ózekti. Óitkeni, búgingi tańda qazaqstandyq áielderdi eldiń qoǵamdyq-saiasi ómirine belsendi qatysýǵa shaqyryp jatqany belgili. Osydan birneshe kún buryn «Nur Otan» partiiasynyń alańynda Nursultan Nazarbaev árbir máslihattyń sailaýaldy partiialyq tiziminiń kem degende 30%-yn áielder quraýy kerek dep atap ótken bolatyn.
«Búgingi tańda áiel - ana, jubai, qyz ǵana emes, sonymen qatar, jumysshy, qyzmetker, basshy siiaqty kóptegen áleýmettik rólderdi de atqaryp júr. Mundai filmder qyzdarǵa batyl, senimdi bolýmen qatar, jaqyndaryń men ómir súrip otyrǵan qoǵamdaǵy beibitshilikti baǵalai bilýdiń mańyzyn kórsetedi», - dedi Dinara Shaijúnisova.
Disneidiń 6 jyl buryn túsirilgen úzdik týyndysy – «Muzdy ólke» filminiń jalǵasy qazirdiń ózinde álemdik prokatta eń kóp qarjy jinaǵan ónimder qataryna enip otyr. Synshylardyń pikirinshe, ekinshi filmniń jelisi kúrdelene túsken.
Óz kezeginde, dýbliaj komandasyndaǵylardyń aitýynsha, basty keiipkerdiń róline laiyqty aktrisa tabý dýbliaj tarihynda eń qiyn jáne uzaq jumys bolǵan. Kastingte Nur-Sultan, Almaty jáne Qaraǵandy qalalarynan 40-tan astam akter qatysyp, nátijesinde basty keiipker Anna Nazerke Serikbolqyzynyń, al Elza Begimnur Halilanyń daýysymen «sóiledi».
BI Group qurylys holdinginiń ókili Qairat Shaiahmetovtiń aitýynsha, kompaniia áleýmettik mańyzy bar jobalarǵa erekshe mán beredi. Sondyqtan BI Group osyndai mańyzdy jobaǵa rizashylyqpen at salysady.
«Ózińnen basta» jobasyn aiasynda qazaq tiline 33 gollivýd kinokartina dýbliajdaldy. Olardyń ishinde «Kólikter 2», «Kek alýshylar: Altron dəýiri», «Batyl júrek», «Koko qupiiasy», «Moana», «Malefisenta», «Aladdin», t.b. filmder bar. Qazaq tili túrik tilinen keiin dýbliajda ekinshi túrki tili bolyp tur jáne «Walt Disney» kompaniiasynyń tarihynda 39-shy; «Sony Pictures» úshin — 7-shi orynda. Shyǵys Eýropa men TMD elderi úshin shyǵarylatyn Blu-Ray-da kórýge arnalǵan qoljetimdi gollivýdtyq filmderdiń 7 negizgi tilder qataryna kirdi.
«Ózińnen basta» jobasynyń seriktesi - Resei men TMD-daǵy eń iri ivi onlain-kinoteatry, munda arnaiy bólimde qazaq tiline dýbliajdalǵan gollivýdtyq kartinalardy kórýge bolady.
