.jpg)
Foto: ashyq derekkóz
Qazaq mádenietiniń kórnekti qairatkeri, "Parasat" jáne "Otan" ordenderiniń iegeri, Qazaqstan Respýblikasy Kompozitorlar odaǵynyń múshesi, professor Iýrii Aravin ómirden ozdy. Bul týraly Mádeniet jáne aqparat ministri Aida Balaeva Facebook jelicindegi paraqshasynda jazdy, dep habarlaidy Ult.kz.
Ministr qairatker tulǵanyń otbasy men týǵan-týystaryna, shákirtteri men áriptesterine qaiǵyra kóńil aitty.
"Iýrii Petrovichtiń esimi halqymyz úshin asa qadirli. Ol qazaqtyń halyq mýzykasyn keńinen nasihattaǵan tanymal tulǵalardyń biri edi. Ulttyq mádenietke bar jan-tánimen berilgen azamat retinde folklorlyq muralardy jinaqtaý maqsatynda kóptegen ǵylymi-shyǵarmashylyq ekspeditsiialarǵa bastamashysy boldy. Kóptegen kóne mýzykalyq týyndylardy jańǵyrtyp, ǵylymi júiege túsirdi", - delingen jazbada.
Aida Balaevanyń aitýynsha, Iýrii Aravin qazaq mýzykasyna, halyq kompozitorlary men aqyndarynyń murasyna arnalǵan birqatar teleradio baǵdarlamalaryn jasady. Qazaq folkloryna shyn júregimen ǵashyq, talantty mýzykatanýshy retinde halqymyzdyń dástúrli mýzykasynyń bai álemin tyńdarmanǵa jańa qyrynan tanytty.
"Iýrii Petrovich óz ómirin ónerge, ult mádenietine arnap, tutas bir shyǵarmashylyq býyndy tárbielegen ulaǵatty ustaz boldy. Qairatkerdiń jarqyn beinesi, rýhaniiatymyzǵa sińirgen ólsheýsiz eńbegi halyq júreginde máńgi saqtalady dep senemin. Marqumnyń jatqan jeri jaily, topyraǵy torqa bolsyn", - dep jazdy ministr.
Ministrdiń kóńil bildirý postynyń astynda jurtshylyq professordyń qazaq óneri men rýhaniiatyna qosqan ólsheýsiz úlesin aityp, pikir bildirýde.
"Imandy bolsyn! Qazaq rýhaniiatyndaǵy orny erek, umytpaimyz".
"Qazaq mádenietin súigen, dáriptegen, qazaqtyń áni men kúiin tynbai nasihattaǵan dos kóńil jan edi. Jany kókten jai tapsyn!"
"Jatqan jeri jaily bolsyn! Qazaq ónerine mol úles qosqan, naǵyz janashyr mýzyka zertteýshisi bola bilgen azamat edi".
"Bir dáýirdiń mádenietin zertteýge ǵumyryn arnaǵan naǵyz ónerdi túsingen shyn asyl bola bildi. Bar ynta-jigerimen memlekettiń óneriniń damýyna ólsheýsiz qyzmet etti. Qazanyń arty qaiyrly bolsyn"
"Jaryqtyqty Jaratqan Iemiz aldynan jarylqasyn.Urpaqtarynyń órkenderi óse bersin", - dep jazdy oqyrmandar.
