Qazaq-ózbek shekarasynda «Ortalyq Aziia» halyqaralyq ortalyǵy ashylady, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Maqtaaral aýdanyn kórshi elmen bailanystyryp turǵan úsh shekara ótkizý beketi jumys isteidi.
Atap aitqanda, «Atameken» kedendik beketi men «Syrdariia», «Tselinnyi» shekara ótkizý beketteri arqyly kúnine júzdegen jeńil kólikter men júk kólikteri barys-kelis jasaýda.
Maqtaaral aýdany Ózbekstannyń Syrdariia jáne Jyzaq oblystaryndaǵy 4 aýdanmen shektesedi.
Osyndai geografiialyq múmkindikti paidalanyp aýdanda Ózbekstan Respýblikasymen saýda-sattyqty damytý úshin halyqaralyq saýda keshenin qurý óte mańyzdy.
Qazaqstan Respýblikasynyń Tuńǵysh Prezidenti – Elbasy N.Nazarbaev 2018 jyly «Ortalyq Aziia» halyqaralyq saýda ekonomikalyq yntymaqtastyq ortalyǵyn qurý týraly tapsyrma bergen bolatyn.
26 qańtarda Qazaqstan Respýblikasynyń Prezidenti Qasym-Jomart Toqaevtyń tóraǵalyǵymen Úkimettiń keńeiitilgen otyrysynda Úkimet basshysyna «Ortalyq Aziia» halyqaralyq saýda ekonomikalyq yntymaqtastyq ortalyǵyn qurý máselesin jedeldetýdi tapsyrdy.
Osyǵan bailanysty QR Saýda jáne integratsiia ministri Baqyt Sultanov jáne oblystyq kásipkerlik jáne saýda basqarmasynyń basshysy Nurbaqyt Imanqulov Maqtaaral aýdanyna jumys saparymen baryp, shekara mańyndaǵy beketterdiń jumysymen tanysty.
Ministrdiń issaparyna Ózbekstan Respýblikasynyń osy salaǵa jaýapty vitse-ministrleri de qosyldy.
Ministr men basqarma basshysy «Tselinnyi» jáne «Syrdariia» shekara ótkizý beketterin arnaiy baryp kórip, halyqaralyq saýda ortalyǵyn qurý úshin nysandardyń múmkindikterin qarap shyqty.
Aýdan ákimi Baqyt Asanov beketterdiń jumysy men múmkindikteri týraly keńinen baiandady.
Máselen, «Tselinnyi» shekara ótkizý beketine jaqyn mańda «Sapar» saýda bazaryn halyqaralyq deńgeide damytýǵa bolatynyn aitty.
«Maqtaaral aýdanynda Uly jibek jolynyń bir tarmaǵy sanalatyn M-39 «Tashkent – Termez» baǵytyndaǵy magistral dálizi bar. Osy avtomobil jolynyń potentsialyn paidalanyp, óńirde saýda-sattyqty joǵary deńgeide damytýǵa múmkindigimiz zor. Máselen, bir kezderi halyqaralyq deńgeide qyzmet kórsetken betonkanyń boiyndaǵy «Sapar» bazaryn halyqaralyq deńgeide qaitadan damytsaq – óńirde myńdaǵan adamdy jumyspen qamti alamyz», – dedi Baqyt Asanov.
«Sapar» bazarynda modernizatsiialaý jumystary 2019 jyly júrgizilgen. Ol úshin bazar iesiniń jeke esebinen 100 million teńgeden asa qarajat jumsalǵan. Nátijesinde utynýshylarǵa jaǵdai jasalyp, qosymsha 100 adam jumyspen qamtyldy.
Ministrdiń sońǵy aialdaǵany – «Atameken» keden beketi.
Buǵan deiin kórshi elge ótpekshi bolǵan júk kólikteri kedendik beket mańynda kepteliske ushyrap, jol qatynasyn qiyndata túsken edi.
Máseleni sheshý úshin kedendik bekettiń aimaǵyn kóriktendirý, kógaldandyrý, keńeitý jospary jasaldy. Atap aitqanda, shekara mańynan saýda logistikalyq ortalyǵyn qurý, onyń ishinde saýda bazarlary, qonaq úi, avtoturaq, qoimalar, turǵyn úiler men túrli sporttyq alańshalardy salý kózdelgen bolatyn.
Qazirgi tańda avtoturaq paidalanýǵa berilgen. Sonymen qatar, kásipkerlerdiń esebinen basqa da nysandar salynýda.
Ministr Baqyt Sultanov «Ortalyq Aziia» halyqaralyq saýda ortalyǵyn qurý úshin tańdalatyn beket týraly jan-jaqty zerttelip, jospar qurylyp, sheshim shyǵarylatynyn aitty.
