Qazaq-qyrǵyz shekarasynda bógelgen júk kólikteriniń sany eki ese azaidy. Ótken aptada "Aq-tilek" kedeninde Qazaqstanǵa ótpek bolǵan júzdegen júk kóligi kezek kútip qalǵan. Kezektiń azaiǵany týraly "Aq-tilek" ótkizý pýnktiniń (Qazaqstanda bul Qarasý keden beketi atalady) basshysy Azamat Anarbaevqa siltep, Azattyqtyń Qyrǵyz qyzmeti habarlady.
Budan buryn Bishkek qyrǵyz-qazaq shekarasy shtattyq rejimde qaita jumys istei bastaǵanyn habarlaǵan.
5 sáýirde Qyrǵyzstan Úkimetiniń otyrysynda premer-ministr Mýhammedkalyi Abylgaziev shekaradaǵy ahýalǵa bailanysty qazaqstandyq áriptesi Asqar Maminmen úsh ret kelissóz ótkizgenin málimdegen. Abylgaziev "ekonomikalyq máselelerdi sheshýde asyqpai oilanýymyz kerek, úkimet kólik kezegin sheshý joldaryn qarastyryp jatyr, Eýraziia ekonomikalyq odaǵy ókilderimen de bailanystamyz" degen.
Bishkek buǵan deiin "shekaradaǵy tekserý Eýraziia ekonomikalyq odaǵynyń talaptaryna qaishy" dep málimdegen.
Biraq 5 sáýirde Nur-Sultanda ótken baspasóz máslihatynda Qazaqstan qarjy ministrligi memlekettik kiris komiteti tóraǵasynyń orynbasary mindetin atqarýshy Qýat Rahimov "shekaradaǵy tekserý zańǵa sai" dep habarlaǵan.
Rahimovtiń aitýynsha, "Qyrǵyzstannan keletin kólikter múlde toqtady deýge bolmaidy. Óitkeni naýryzdyń 27-sinen 4-sáýirge deiin qyrǵyz taýaryn tiegen 265 avtokólik, tranzittik baǵyttaǵy 455 júk kóligi Qazaqstanǵa kirgen".
19 naýryzdan beri Qazaqstan men Qyrǵyzstan shekarasyndaǵy "Aq-tilek avtojol" ótkizý beketinde kólik keptelisi paida bolyp, 31 naýryzda olardyń sany 200-den asqan edi. Buǵan Qazaqstan jaǵyna ótkeli turǵan kólikterdiń muqiiat tekserilýi sebep bolǵany habarlanǵan.
