قازاق-قىرعىز شەكاراسىندا بٶگەلگەن جٷك كٶلٸكتەرٸنٸڭ سانى ەكٸ ەسە ازايدى. ٶتكەن اپتادا "اق-تٸلەك" كەدەنٸندە قازاقستانعا ٶتپەك بولعان جٷزدەگەن جٷك كٶلٸگٸ كەزەك كٷتٸپ قالعان. كەزەكتٸڭ ازايعانى تۋرالى "اق-تٸلەك" ٶتكٸزۋ پۋنكتٸنٸڭ (قازاقستاندا بۇل قاراسۋ كەدەن بەكەتٸ اتالادى) باسشىسى ازامات انارباەۆقا سٸلتەپ, ازاتتىقتىڭ قىرعىز قىزمەتٸ حابارلادى.
بۇدان بۇرىن بٸشكەك قىرعىز-قازاق شەكاراسى شتاتتىق رەجيمدە قايتا جۇمىس ٸستەي باستاعانىن حابارلاعان.
5 سەۋٸردە قىرعىزستان ٷكٸمەتٸنٸڭ وتىرىسىندا پرەمەر-مينيستر مۋحاممەدكالىي ابىلگازيەۆ شەكاراداعى احۋالعا بايلانىستى قازاقستاندىق ەرٸپتەسٸ اسقار مامينمەن ٷش رەت كەلٸسسٶز ٶتكٸزگەنٸن مەلٸمدەگەن. ابىلگازيەۆ "ەكونوميكالىق مەسەلەلەردٸ شەشۋدە اسىقپاي ويلانۋىمىز كەرەك, ٷكٸمەت كٶلٸك كەزەگٸن شەشۋ جولدارىن قاراستىرىپ جاتىر, ەۋرازييا ەكونوميكالىق وداعى ٶكٸلدەرٸمەن دە بايلانىستامىز" دەگەن.
بٸشكەك بۇعان دەيٸن "شەكاراداعى تەكسەرۋ ەۋرازييا ەكونوميكالىق وداعىنىڭ تالاپتارىنا قايشى" دەپ مەلٸمدەگەن.
بٸراق 5 سەۋٸردە نۇر-سۇلتاندا ٶتكەن باسپاسٶز مەسليحاتىندا قازاقستان قارجى مينيسترلٸگٸ مەملەكەتتٸك كٸرٸس كوميتەتٸ تٶراعاسىنىڭ ورىنباسارى مٸندەتٸن اتقارۋشى قۋات راحيموۆ "شەكاراداعى تەكسەرۋ زاڭعا ساي" دەپ حابارلاعان.
راحيموۆتٸڭ ايتۋىنشا, "قىرعىزستاننان كەلەتٸن كٶلٸكتەر مٷلدە توقتادى دەۋگە بولمايدى. ٶيتكەنٸ ناۋرىزدىڭ 27-سٸنەن 4-سەۋٸرگە دەيٸن قىرعىز تاۋارىن تيەگەن 265 اۆتوكٶلٸك, ترانزيتتٸك باعىتتاعى 455 جٷك كٶلٸگٸ قازاقستانعا كٸرگەن".
19 ناۋرىزدان بەرٸ قازاقستان مەن قىرعىزستان شەكاراسىنداعى "اق-تٸلەك اۆتوجول" ٶتكٸزۋ بەكەتٸندە كٶلٸك كەپتەلٸسٸ پايدا بولىپ, 31 ناۋرىزدا ولاردىڭ سانى 200-دەن اسقان ەدٸ. بۇعان قازاقستان جاعىنا ٶتكەلٸ تۇرعان كٶلٸكتەردٸڭ مۇقييات تەكسەرٸلۋٸ سەبەپ بولعانى حابارلانعان.
