21 naýryz kúni «Qazaq handyǵy» serialynyń kinonusqasy - «Qazaq handyǵy. Altyn taq» filmi jalpyulttyq prokatqa shyǵady, dep habarlaidy "Ult aqparat" «Qazaqfilmge» silteme jasap.
«Atalǵan aýqymdy jobanyń ekinshi maýsymyn QR Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» kinostýdiiasy túsirgen», - delingen habarlamada.
Tarihqa kóz júgirtsek, XV ǵasyrdyń orta sheninde Shyńǵys han men Ámir Temir imperiialarynyń qirandysynyń ornynda birneshe ulystar boi kótergen. Orys han taǵyn kúshpen ielenip, 40 jyl boiy jeke dara bilik qurǵan Ábilqaiyr hannyń aýyr ezgisi - Deshti qypshaq jurtynyń jappai narazylyǵyn týdyrady. 1465 jyly Kerei men Jánibek sultandar Kók Orda bileýshisi Ábilqaiyr Shaibanige narazy kóshpeli taipalardy bir týdyń astyna jiyp, Jetisý ólkesinde - «Qazaq Handyǵyn» qurdy. Alaida Jas ulysty jórgeginde tunshyqtyrǵysy kelgen Ábilqaiyr han, ata jaýy Kerei men Jánibekke qarsy joiqyn joryqqa attandy. Alda uly maidan kútip turǵan edi. Al Kerei han men Jánibek sultannyń basty maqsaty -Syǵanaqtaǵy altyn taqty qaitaryp alý bolatyn... Osy tarihi oqiǵalardy «Qazaq handyǵy. Altyn taq» tarihi kartinasynan kóre alasyz.
Tarihi kinodilogiia Iliias Esenberlinniń «Kóshpendiler» trilogiiasynyń birinshi romany boiynsha túsirilgen.
Filmniń rejisseri - Rústem Ábdirashov. Ol - «Quraq kórpe», «Qaladan kelgen qyz», «Stalinge syilyq», Elbasy joly kinoepopeiasynyń: «Balalyq shaǵymnyń aspany», «Ot-ózen», «Temirtaý», «Tyǵyryqtan jol tapqan» jáne «Qazaq handyǵy. Almas qylysh» atty kinotýyndylarynyń avtory.
Eske sala ketsek, Astanada jaqynda «Qazaq handyǵy. Altyn taq» filminiń tusaýkeseri ótken bolatyn.
