Qalada mereke kúnderi jumysyn toqtatpaǵan taǵy bir meiramhana anyqtaldy. Monitoringtik top pen qalalyq shtabtyń mamandary birlesip, kóńil kóteretin orynnyń ishine 3 saǵat degende ázer kirdi. Eń qyzyǵy, karantin talaptaryn saqtamaǵan qonaqtardyń arasynda elge tanymal ánshiler men ártister de bar bop shyqty, - dep habarlaidy "Ult aqparat" Almaty.tv telearnasyna silteme jasap.
Oqiǵa Medeý aýdanynda bolǵan. Qaladaǵy barlyq tekserýshiler aiaǵynan tik turyp, esikti uzaq ýaqyt ashpaǵan meiramhanany 3 saǵat qorshaýda ustady. Telearna tilshisiniń aitýynsha, bir qaraǵanda meiramhana jabyq siiaqty. Terezelerin jaryq kórinbeitin etip qarańǵylap tastaǵan. Biraq syrtta kólik kóp. Bireýiniń iesi, temir tulparyn qalai bolsa solai qoia salǵan. Jol erejesi óreskel buzylǵandyqtan, mamandar evakýator shaqyrtyp, kólikti aldyrtyp tastady.
"Kútpegen jerden ishtegi qonaqtardyń biri esikti ashyp berdi. Barlyq kelýshi ár burysh-buryshqa, tesikke tyǵylyp úlgeripti. Alaida eshkim qutyla almady. Eń qyzyǵy olardyń arasynda tanymal ánshi Qairat Nurtas ta bar.
Ánshini kóleńkeleýge tyrysqan kúzetshiler tilshilerge de tap berdi. Tipti, bizdiń arnanyń operatoryna shabýyl jasap, kamerany syndyrýǵa tyrysty. Kináni ózinen emes ózgeden izdeýge tyrysyp baqqan arandatýshylar da tabyldy", - deidi tilshi.
Keiin mamandar jaryqty qosyp, ishtegi barlyq bólmeni aralap shyqqan. Aqparat boiynsha, bul jerde týǵan kún keshi ótip jatqan. Oǵan qosa, qatań túrde tyiym salynǵan qor-qor da shegilgen. Izdeý jumystary aiaqtalǵan soń kelýshiler qyzmettik kólikke tielip, politsiiaǵa birtindep jetkizildi. Jýrnalistiń aitýynsha, sonda da qarsylyq tanytqandar boldy.
"Meiramhanada adam sany óte kóp. Olar karantin talaptaryn buzǵany azdai, jol erejesin de saqtamaǵan. Kólikterdi jolǵa durys qoimaǵan. Qazirgi tańda qalada tekseristiń kúsheitilgenin taǵy da eskertkim keledi. Densaýlyǵymyzdy oilap, úide otyraiyq. Reid jumystary aldaǵy ýaqytta da jalǵasa beredi", - dedi SJQK agenttigi janyndaǵy arnaiy respýblikalyq monitoringtik top tóraǵasynyń orynbasary Rafael Gasanov.
Kásipkerlik nysanda 200-den asa adam bolǵany anyqtaldy. Barlyǵyn Medeý aýdandyq politsiia basqarmasyna jetkizilip, ákimshilik quqyq buzýshylyqtyń 425-babyna sáikes hattama toltyryldy. Kelýshiler men mekeme qyzmetkerlerine 87 myń kóleminde, kásipkerge 670 myń teńge shamasynda aiyppul salyndy.
