Úkimet otyrysynda memlekettik biýdjettiń atqarylý barysyn baiandaǵan Qarjy ministri Erulan Jamaýbaev 2022 jyldyń 10 aiynyń qorytyndysy boiynsha ministrlikter men ákimdikter 278 milliard teńgeni igermegenin aitty, - dep habarlaidy Tengrinews.kz agenttigi.
"278 milliard teńge igerilmegen. Indýstriia jáne infraqurylymdyq damý, Ishki ister, Tótenshe jaǵdailar jáne Oqý-aǵartý ministrlikteri biýdjetti durys igermegen", - dedi Jamaýbaev.
Jergilikti biýdjettiń shyǵystary - 8,1 trillion teńge. Oryndalmaǵany - 520 milliard teńge.
"Biýdjet durys igerilmegen óńirler qatarynda Astana, Mańǵystaý, Batys Qazaqstan jáne Aqtóbe oblystary bar. Igerilmeýdiń negizgi sebepterine tólemniń negizdiligin rastaityn qujattardy usynbaý, oryndalǵan jumystardyń aktilerin, shot-faktýralardy ýaqtyly usynbaý siiaqty jaittar bolǵan", - dep tolyqtyrdy Qarjy ministrliginiń basshysy.
Memlekettik biýdjetke transfertterdi eseptemegende 12 trillion 427 milliard teńge somasynda kirister túsip, jospar 104,1 paiyzǵa oryndalǵan.
Budan basqa, respýblikalyq biýdjetke transfertterdi eseptemegende shamamen 8,4 trillion teńge túsip, jospar 102,2 paiyzǵa oryndalǵan.
