Ishki ister ministri Qalmuhanbet Qasymov Qazaqstanda travmatikalyq qarýlarǵa nelikten tyiym salynǵany týraly tilshiler suraǵyna jaýap berdi, dep habarlaidy QazAqparat tilshisi.
«Birinshiden, travmatikalyq qarý óziniń sipaty turǵysynda otty iir oiyqty myltyqqa uqsaidy. Ony jaqyn arada qoldanǵan jaǵdaida naǵyz iir oiyqty myltyqtan kóp aiyrmashylyǵy joq. Qiyn jaǵdaiǵa, tipti ólimge deiin aparýy múmkin. Ekinshiden, jastar travmatikalyq qarýdy kikiljiń kezinde jii qoldana bastady. Úshinshiden, ony jasyryp alyp júrý óte ońai. Kez kelgen adam ony kez kelgen jerde qoldana alady. Sondyqtan, osy máseleniń barlyǵyn zerttei otyryp, biz oǵan shekteý qoiý jón dep taptyq. Nátije birden kórindi. Bizdiń tyiymnan keiin travmatikalyq qarýdyń qatysy bar qylmystar sany 87 paiyzǵa azaidy», - dedi ministr OKQ-da ótken baspasóz máslihatynda.
Onyń aitýynsha, TMD elderi ishinde tek Resei men Qyrǵyz Respýblikasynda ǵana azamattarǵa travmatikalyq qarý alyp júrýge ruqsat berilgen.
«Onyń ústine, Reseide tyiym salý týraly áńgime qozǵalǵanymen, keiin ol jaqta tek otandyq travmatikalyq qarýlardy alyp júrýge ruqsat berdi. Ony qoldanýǵa Japoniia, Malaiziia, Avstriia, Qytai elderinde de tyiym salynǵan. Ekinshiden, Grýziia, Litva, Estoniia, Finliandiia sekildi elderde travmatikalyq qarýdy ustap júrmei-aq (iaǵni, úiinde ustap), ózin-ózi qorǵaý maqsatynda qoldanýǵa ruqsat berilgen», - dedi ministrlik basshysy.
Qalmuhanbet Qasymov sonymen birge, Jańa Zelandiia, Izrail, AQSh, Argentina sekildi elderde zańdy túrde qysqa oqpandy, iir oiyqty, travmatikalyq qarýdy ustaýǵa ruqsat berilgenin aitty.
«Bizdiń oiymyzsha, travmatikalyq qarýǵa tyiym salý týraly sheshim durys. Ony ustap júrýdiń esh qajeti joq», - dedi ministr.
