Memleket basshysy Qasym-Jomart Toqaevtyń atyna Qurban ait merekesine orai shet memleketterdiń Prezidentteri men halyqaralyq uiymdardyń basshylarynan quttyqtaý hattary men jedelhattary kelip túsýde, dep habarlaidy Aqordanyń resmi saity.
Ózbekstan Prezidenti Shavkat Mirziioev óziniń quttyqtaýynda Qasym-Jomart Toqaevtyń eki el arasyndaǵy dostyq pen baýyrlastyqty, saýda-ekonomikalyq, áleýmettik, rýhani-aǵartýshylyq baǵyttaǵy qatynastardy, sondai-aq, halyqtarymyzdyń ortaq syn-qaterlerge qarsy kúrestegi yntymaqtastyǵyn jan-jaqty nyǵaitýǵa zor úles qosqanyn atap ótken.
Qyrǵyzstan Prezidenti Sooronbai Jeenbekov eki el halqynyń múddesi úshin Qyrǵyzstan men Qazaqstan arasyndaǵy strategiialyq seriktestik, dostyq, odaqtastyq jáne tatý kórshilik bailanystar Qasym-Jomart Toqaevtyń tikelei qoldaýymen odan ári nyǵaia túsetinine senim bildirdi.
Tájikstan Prezidenti Emomali Rahmon Qasym-Jomart Toqaevpen birlese otyryp, Tájikstan men Qazaqstan arasyndaǵy tyǵyz yntymaqtastyqty nyǵaitýǵa jáne keńeitýge baǵyttalǵan ózara yqpaldastyqty jan-jaqty ilgeriletýge nietti ekenin jetkizgen.
Túrikmenstan Prezidenti Gýrbangýly Berdimuhamedov Qasym-Jomart Toqaevqa zor densaýlyq, baqyt jáne onyń qolǵa alǵan barlyq bastamalary men igi isterine tabys, al baýyrlas Qazaqstan halqyna baq-bereke tiledi.
Túrkiia Prezidenti Rejep Taiip Erdoǵan óziniń quttyqtaý hatynda «Jeke ózimniń jáne halqymnyń atynan Qurban ait merekesimen shyn júrekten quttyqtaimyn. Qazir bastan keshirip jatqan qiyn-qystaý kezeńde bizdi biriktiretin osy qasietti merekede Sizge zor densaýlyq, baqyt, al baýyrlas Qazaqstan halqyna beibitshilik, baq-bereke tileimin», – dep jazǵan.
Memleket basshysyn Qurban ait merekesine orai quttyqtap, jyly lebiz bildirgen quttyqtaý jedelhattaryn Ázerbaijan Prezidenti Ilham Áliev, Iran Prezidenti Hasan Rýhani, Egipet Prezidenti Abdel Fattah As-Sisi, Iordaniia Koroli II Abdalla, Bahrein Koroli Sheih Hamad ben Isa Ál-Halifa, Oman Sultany Haisam ben Tariq, Marokko Koroli VI Muhammed, Aljir Prezidenti Abdelmadjid Tebbýn, Aýǵanstan Prezidenti Ashraf Ǵani, Palestina basshysy Mahmýd Abbas pen Filippin kóshbasshysy Rodrigo Dýterte, sondai-aq, Islam yntymaqtastyǵy uiymynyń Bas hatshysy Iýsef ben Ahmad Ál-Oseimin, ISESKO-nyń Bas direktory Salim M.Ál-Malik, Kavkaz Musylmandary Basqarmasynyń tóraǵasy, TMD Dinaralyq keńesiniń teńtóraǵasy, sheih-ýl-islam Allahshúkir Pasha-zade joldady.
Quttyqtaý jedelhattary áli de kelip túsip jatyr.
