Memleket basshysy Qasym-Jomart Toqaevtyń atyna Respýblika kúnine orai shet memleketterdiń prezidentterinen jáne halyqaralyq uiymdardyń jetekshilerinen quttyqtaý jedelhattary kelip túsip jatyr, - dep habarlaidy "Ult aqparat".
Aqordanyń baspasóz qyzmetiniń málimetinshe, Resei prezidenti Vladimir Pýtin Memleket basshysyn jáne Qazaqstan halqyn Respýblika kúnimen quttyqtap, beibitshilik jáne baq-bereke tiledi.
"Qazaqstan ekonomikalyq, áleýmettik, ǵylymi-tehnikalyq jáne basqa da salalarda tańǵalarlyq nátijelerge qol jetkizdi, halyqaralyq isterde mańyzdy ról oinaidy. Memleketterimiz arasyndaǵy strategiialyq seriktestik jáne odaqtastyq qarym-qatynastar tabysty damyp keledi", - delingen jedelhatta.
Qytai Halyq Respýblikasynyń tóraǵasy Si Tszinpin jedelhatynda prezident Qasym-Jomart Toqaevtyń Ádiletti Qazaqstan qurý jolyndaǵy reformaǵa belsene kiriskenin atap ótip, qyrkúiek aiyndaǵy Qazaqstanǵa memlekettik sapary mazmundy ári jemisti bolǵanyn jetkizdi.
"Ekijaqty qarym-qatynastyń damýyna nazar aýdara otyryp, men Sizben birge Qytai jáne Qazaqstan arasyndaǵy máńgilik jan-jaqty strategiialyq seriktestikti damytýǵa ázirmin", - dep jazylǵan jedelhatta.
Túrkiia prezidenti Rejep Taiip Erdoǵan Memleket basshysyn ulttyq merekemizben quttyqtai kele, dostas ári baýyrlas Qazaqstannyń táýelsizdigin alǵash moiyndaǵan el retinde Túrkiia ótken 30 jyl ishinde Qazaqstannyń barlyq salada qol jetkizgen jetistikterine kýá bolyp kele jatqanyn aitqan.
"Ortaq til, mádeniet jáne tarihi bailanystardan nár alyp, "Keńeitilgen strategiialyq seriktestik" deńgeiine jetken qarym-qatynasymyz ben yntymaqtastyǵymyzdy eki eldiń múddesine sai odan ári damytýǵa jáne tereńdetýge niettimi", - dep jazylǵan jedelhatta.
Frantsiia prezidenti Emmanýel Makron eki el arasynda diplomatiialyq qarym-qatynas ornaǵanyna 30 jyl tolǵan osynaý airyqsha kezeńde ekijaqty dialogtyń qarqyndy damyp kele jatqanyna qýanyshty ekeni jazylǵan.
"Biz Siz júrgizip jatqan saiasi, ekonomikalyq jáne áleýmettik reformalardy airyqsha qyzyǵýshylyqpen baqylap otyramyz, Frantsiia olardyń júzege asyrylýyn árqashan qoldaýǵa ázir ekenine senim bildirgim keledi", - dep jazylǵan jedelhatta.
Tájikstan prezidenti Emomali Rahmon jedelhatynda ózara syilastyq pen senimniń berik tarihi dástúrine negizdelgen qazaq-tájik qarym-qatynasy jan-jaqty damyp kele jatqanyna rizashylyǵyn bildirgen.
Túrikmenstan prezidenti Serdar Berdimuhamedov pen Túrikmenstannyń Milli Gengeshi Halq Maslahatynyń tóraǵasy Gýrbangýly Berdimuhamedov quttyqtaý jedelhattarynda túrikmen-qazaq strategiialyq seriktestigi eki el halqynyń igiligi úshin qarqyndy dami beretinine senim bildirdi.
Sondai-aq Birikken Ulttar Uiymynyń Bas hatshysy Antoniý Gýterrish Qazaqstan halqyn jáne Qasym-Jomart Toqaevty Respýblika kúnimen quttyqtady.
"Osynaý airyqsha kúni Birikken Ulttar Uiymy Qazaqstannyń barsha azamaty syn-qaterge tótep berip, Turaqty damý maqsattaryna jetý jolyndaǵy progresti jedeldetinine jáne álemniń barlyq halqynyń igiligi úshin ádiletti ári beibit álemdi qurýdan tys qalmaitynyna senim bildiredi", - dep atap ótti BUU Bas hatshysy.
Sonymen qatar, Iran Islam Respýblikasynyń prezidenti Ibrahim Raisi, Mońǵoliia prezidenti Ýhnaagiin Húrelsýh, Avstriia prezidenti Aleksandr Van der Bellen, Horvatiia prezidenti Zoran Milanovich, Portýgaliia prezidenti Marselý Rebelý de Soýza, Serbiia prezidenti Aleksandr Výchich, Singapýr prezidenti Halima Iakob, TMD Atqarýshy komitetiniń tóraǵasy - atqarýshy hatshysy Sergei Lebedev, Islam yntymaqtastyǵy uiymynyń bas hatshysy Hissein Brahim Taha ózderiniń quttyqtaý jedelhattaryn joldaǵan.
Quttyqtaý jedelhattary áli de kelip jatyr.
