Memleket basshysy Qasym-Jomart Toqaev Resei Federatsiiasy Úkimetiniń Tóraǵasy Mihail Mishýstinmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev Mihail Mishýstindi Resei Úkimetiniń tóraǵalyǵyna taǵaiyndalýymen quttyqtap, Resei Federatsiiasymen aradaǵy ekijaqty yntymaqtastyqtyń strategiialyq jáne odaqtastyq qatynastardy odan ári tereńdete berýdiń mańyzdylyǵyn atap ótti.
– Siz Úkimet Tóraǵasy retindegi alǵashqy sheteldik saparyńyzdy Qazaqstanǵa jasap otyrsyz. Bunyń simvolikalyq máni bar ári bizdiń Eýraziialyq ekonomikalyq odaq aiasyndaǵy strategiialyq yntymaqtastyqty jáne ózara is-qimyldardy damytý turǵysynan da mańyzy zor, – dedi Prezident.
Kezdesýde 31 qańtar kúni Almaty qalasynda Eýraziialyq ekonomikalyq odaqty odan ári damytýdyń ózekti máseleleri talqylanǵan Eýraziialyq Úkimetaralyq Keńes otyrysynyń qorytyndylary sóz boldy.
– Eýraziialyq Úkimetaralyq Keńestiń otyrysyna qatysqanyńyzdy bilemin. Onda búgingi kúnniń óte ózekti máselesi – tsifrlandyrý talqylandy. Qazaqstan bul ispen belsendi ainalysýda. Dál osy sala boiynsha sizderdiń tájiribelerińiz mol. Sondyqtan yntymaqtastyqqa niettimiz, – dedi Memleket basshysy.
Qazaqstan Prezidenti qabyldanǵan kelisimder Eýraziialyq ekonomikalyq odaqtyń órkendeýine tyń serpin beretinine senim bildirdi.
Osy oraida Qasym-Jomart Toqaev taýar ainalymynyń, qyzmet kórsetýdiń, kapital jáne jumys kúshiniń erkin qozǵalysyn qamtamasyz etý úshin kedergilerdi birtindep joiý sharalaryn qabyldaý qajettigin atap ótti.
Resei Premer-Ministri Memleket basshysyna Nur-Sultan qalasyna saparlap kelýge múmkindik jasaǵany úshin alǵys bildirdi.
– Resei men Qazaqstandy baýyrlastyq, seriktestik jáne odaqtastyq qarym-qatynastar bailanystyrady. Saýda-ekonomikalyq jáne investitsiialyq ózara is-qimyldar qarqyndy damyp, aimaqaralyq bailanystar men iskerlik toptardyń qarym-qatynastary nyǵaiyp keledi. Eýraziialyq ekonomikalyq integratsiialar protsesinde, UQShU, TMD, ShYU jáne basqa da kópjaqty bailanystarda bizdiń elderimiz jetekshi ról atqarady, – dedi Mihail Mishýstin.
Resei Úkimetiniń Tóraǵasy Qazaqstan Prezidentine Vladimir Pýtinniń sálemin jetkizip, 2020 jyldyń 9 mamyr kúni Máskeý qalasynda ótetin Jeńis kúnine arnalǵan sharaǵa qatysýǵa shaqyrdy.
– Jeńistiń 75-jyldyǵyna shaqyrýdy úlken yqylaspen qabyldap, dál sol kúni Qyzyl Alańda ótetin Jeńis paradyn tamashalaýǵa baramyn. Bul bizdiń ortaq merekemiz, – dedi Qasym-Jomart Toqaev.
Taraptar Qazaqstan men Resei arasyndaǵy yqpaldastyqtyń basym baǵyttaryn, atap aitqanda, Jaiyq transshekaralyq ózeniniń sý resýrstaryn tiimdi paidalaný jáne ekologiia máselelerin talqylady.
Qazaqstan Prezidenti ekijaqty saýda-ekonomikalyq jáne mádeni-gýmanitarlyq bailanystardy odan ári nyǵaitý maqsatynda eki el Úkimetteriniń tyǵyz jumys isteýi qajet ekenin aitty.
Memleket basshysy biyl kúzde Kókshetaýda ótetin, ekologiia máselelerine arnalǵan XVII Aimaqaralyq yntymaqtastyq forýmyna Resei Prezidenti Vladimir Pýtinniń qatysatynyna senim bildirdi.
