Prezident Qasym-Jomart Toqaev QR Sybailas jemqorlyqqa qarsy is-qimyl agenttiginiń tóraǵasy Alik Shpekbaevty qabyldady, – dep habarlaidy Aqorda.
Memleket basshysyna Agenttiktiń ótken jyly atqarǵan jumysynyń negizgi nátijeleri baiandaldy.
Alik Shpekbaev Memleket basshysyna Sybailas jemqorlyqqa qarsy bastamalardyń iske asyrylýy jáne elimizdiń Transparency International sybailas jemqorlyqty qabyldaý indeksi boiynsha ilgerilegeni týraly aitty. Agenttik tóraǵasynyń aitýynsha, júieli júrgizilip jatqan saiasi jańǵyrý men sybailas jemqorlyqqa qarsy reformalardyń arqasynda Qazaqstan atalǵan reitingte alǵash ret 38 ball jinaǵan. Bul elimizdiń 19 satyǵa joǵary kóterilip, 94-shi orynǵa taban tireýine múmkindik bergen.
Qasym-Jomart Toqaev Agenttiktiń shyǵyndardy óteý jáne tiimsiz jumsalǵan qarjynyń aldyn alý boiynsha atqarǵan jumysynyń nátijesinde 95,6 milliard teńgeniń keri qaitarylǵanyn, onyń ekonomikalyq tiimdiligin oń baǵalady. Sondai-aq sybailas jemqorlyq qylmystarynyń 5 paiyzǵa tómendegenin atap ótti.
Memleket basshysy sybailas jemqorlyqqa qarsy jańa zańnamalyq bastamalardy sapaly túrde júzege asyrýǵa jáne EYDU men GREKO standarttaryna sáikes salalyq zańnamany jańǵyrtýdy jalǵastyrýǵa, onyń ishinde, sheneýnikterdiń shyǵystary men kiristeri bir-birine sáikes kelmegeni úshin jaýapkershilik engizý máselesine nazar aýdardy.
Kezdesý sońynda Prezident Agenttik tóraǵasyna jazany bultartpai oryndaý qaǵidatyn qatań saqtaýdyń mańyzdy ekenin aityp, qylmystyń aldyn alý isinde azamattyq qoǵammen baiypty jumys júrgizýdi tapsyrdy.
