Foto: Aqorda
Memleket basshysy Qasym-Jomart Toqaev «Turkistan» gazetine suhbat berip, 2025 jyldyń qorytyndysy men el damýynyń negizgi baǵyttary týraly pikir bildirdi, dep habarlaidy Ult.kz.
Prezidenttiń aitýynsha, ótken jyly Qazaqstan ekonomikasy 6 paiyzdan astam ósip, ishki jalpy ónim 300 milliard dollar mejesine jetken. Al jan basyna shaqqandaǵy IJÓ 15 myń dollardan asyp, bul kórsetkish óńir úshin rekordtyq deńgeige jetken.
– Jalpy, oidaǵydai jumys isteldi deýge bolady. Biraq toqmeiilsýge múlde bolmaidy. Biz tynymsyz eńbektenip, tek alǵa umtylýymyz kerek, – dedi Memleket basshysy.
Sonymen qatar Qasym-Jomart Toqaev infliatsiia deńgeiiniń joǵary bolýy azamattardyń ál-aýqatyn arttyrýǵa kedergi keltirip otyrǵanyn atap ótti. Osyǵan bailanysty Úkimet pen ákimderge áleýmettik-ekonomikalyq turaqtylyqty nyǵaitý jóninde naqty mindetter júkteletinin aitty.
Prezident 2025 jyldyń basty qorytyndysy retinde Qazaqstannyń reformalardy júzege asyrýǵa birjola bet burǵanyn atap ótti. Onyń aitýynsha, el jańǵyrý jolyna túsip, ádildik, zań men tártip, eńbekqorlyq qaǵidattaryna negizdelgen qoǵam qalyptasyp keledi.
– AQSh prezidenti Tramptyń «aqylǵa syiymdy oi» strategiiasynyń yqpalymen jahandaný úderisi keiinge ysyryla bastady. Biz de Qazaqstanda ádildik, zań men tártip, eńbekqorlyq siiaqty memleketimizdiń bolashaǵy úshin airyqsha mańyzdy qaǵidattarǵa negizdelgen qoǵam quryp jatyrmyz. Uzaq merzimge arnalǵan nátijege jetý úshin bul jumys jańa jylda eki ese tyń qarqynmen jalǵasyn tabady, - dedi Prezident.
Suhbattyń tolyq nusqasyn saittan oqi alasyz.
