Oral qalasynda 36 jastaǵy er adamnyń máiiti tabyldy. Aldyn ala málimet boiynsha, ol pyshaq jaraqattarynan kóz jumǵan. Kisi óltirdi degen kúdikpen 43 jastaǵy er adam ustaldy, dep habarlaidy ult.kz.
Batys Qazaqstan oblysy politsiia departamentiniń málimetinshe, oqiǵa 7 qazan kúni keshke K. Tsiolkovskii kóshesindegi úilerdiń biriniń mańynda bolǵan. Politsiia qyzmetkerleri jedel-izdestirý sharalary barysynda kúdiktini anyqtap, qolǵa túsirdi. Ol ýaqytsha ustaý izoliatoryna qamaldy.
Atalǵan derek boiynsha sotqa deiingi tergep-tekserý bastaldy. Qazir oqiǵanyń mán-jaiy anyqtalyp jatyr. Tergeý barysy oblystyq politsiia departamenti basshylyǵynyń baqylaýynda. Qylmystyq-protsestik kodekstiń 201-babyna sáikes, tergeý múddesine bailanysty ózge aqparat jariialanbaidy.
Turǵyndardyń aitýynsha, eki er adam birge ishimdik ishken. Keiin olardyń biri úiine qaityp bara jatqanda, ekinshisi sońynan baryp, oǵan birneshe ret pyshaq jaraqatyn salǵan. Qaza tapqan 36 jastaǵy er adamnyń artynda kishkentai balalary qaldy.
