Atyraý oblysynda Kaspii jaǵalaýynda 10 kún janǵan qamys órti sóndirildi, dep habarlaidy QazAqparat.
Oblystyq tótenshe jaǵdailar departamenti baspasóz qyzmetiniń málimetinshe, qamys órti 5 qazanda Atyraý oblysynyń Qurmanǵazy aýdanyndaǵy Qurmanǵazy aýylynan 60 shaqyrym jerdegi Kaspii teńiziniń jaǵalaýynda tutanǵan. Al, 7 qazanda qamys órtin sóndirý úshin sý shashatyn VSÝ-5 qurylǵysy bar «Mi-871» tikushaǵy tartyldy. Sondai-aq, oblystyq tótenshe jaǵdailar departamentiniń 18 qyzmetkeri men Qurmanǵazy aýdandyq bóliminen qutqarýshylar jumyldyryldy.
Keiin janý oshaǵyna jaqyn ornalasqan sý kózin izdeý maqsatynda «Qazaviaqutqarý» AQ batys óńirlik filialynyń «MI-871» tikushaǵy saǵat 12:12-de áýege kóterildi. Ekipaj 5 shaqyrym qashyqta ornalasqan sý qoimasyn tapqan. «MI-871» tikushaǵynyń VSÝ-5 sý aǵyzý qurylǵysymen janý oshaqtaryna áýeden 30 tonna sý tógildi.
Oblystyq tótenshe jaǵdailar departamentiniń baspasóz qyzmeti 11 qazanda jergilikti ýaqytpen saǵat 12:00-ge deiin jaǵalaýdaǵy qamys órtiniń eki frontaldy janý oshaǵy anyqtalǵanyn málim etti. Sol kúni Kaspii jaǵalaýyndaǵy 550 gektar aýmaqta qamys janǵany anyqtaldy. Tikushaqtyń sý shashý qurylǵysymen 21 ret sý tógildi. Jalyndy sóndirý úshin tógilgen sýdyń mólsheri 63 tonnany quraǵan.
Keshe, 14 qazanda saǵat 17.30-da Kaspii teńiziniń jaǵalaýynda qamys órti tolyǵymen joiyldy.
«Qamys órtinen zardap shekkender joq. Jaǵalaýdaǵy órt aýmaǵy 550 gektar aýmaqty qurady. Sý aǵyzý qurylǵysy bar tikushaqtyń kómegimen 35 gektarda janǵan jalyn sóndirildi. Jeke quramnyń kúshimen 272 gektardy sharpyǵan órt joiyldy. Al, 243 gektardyń órti ózdiginen sóndi. «Qazaviaqutqarý» AQ-nyń tikushaǵymen órt oshaǵyna 63 tonnadan astam sý tógildi» - dep málim departamenttiń baspasóz qyzmetinen.
Kaspii teńiziniń jaǵalaýyndaǵy qamys órtin sóndirýge departamenttiń jeke quramynan 34 adam, 5 tehnika, 4 motosorǵysh, 1 generator, 40 jeń, 1 úrlemeli shatyr, sondai-aq, O.Kóshekov atyndaǵy Atyraý agrarlyq-tehnikalyq kolledjiniń 1 John Deere-6135b traktory men 1 qyzmetkeri, «Qazaviaqutqarý» AQ-dan MI-871 tikushaǵy men 5 adam tartylǵan.
Qurmanǵazy aýdanynyń ákimdigi qamys órtin sóndirýshshilerge azyq-túlik ónimderi men janar-jaǵar mai jetkizýdi uiymdastyrǵan.
