Kaspii teńizindegi áskeri oqý-jattyǵý kezinde áskeri qyzmetshilerdiń qaza bolýyna bailanysty Qorǵanys ministrligi júiesiniń bes laýazymdy tulǵasy ustaldy, dep habarlaidy ult.kz.
Ustalǵandar qyzmetke salǵyrt qaraý jáne keme júrgizý qaǵidalaryn buzý boiynsha kúdikke ilingen.
Olardyń qatarynda:
- QR Qarýly kúshteri Áskeri-teńiz kúshteri Bas qolbasshysynyń birinshi orynbasary – shtab bastyǵy;
- eki áskeri bólimniń komandiri;
- teńiz jaiaý áskerleri rotasynyń komandiri;
- «Qaisar» kateriniń komandiri bar.
Barlyǵy kúdikti dep tanylyp, Aqtaý qalasy politsiia basqarmasynyń ýaqytsha ustaý izoliatoryna qamalǵan.
Áskeri qyzmetshilerdiń qaza bolý faktisi boiynsha Ishki ister ministrliginiń áskeri-tergeý bólimshesi sotqa deiingi tergep-tekserý júrgizip jatyr. Qylmystyq is qyzmetke salǵyrt qaraý jáne keme júrgizý qaǵidalaryn buzý baptary boiynsha tergelýde.
Tergeý barysynda oqý-jaýyngerlik mindetti uiymdastyrý jáne oryndaý kezinde sheshimderdiń qalai qabyldanǵany, qaýipsizdik talaptarynyń saqtalýy, aýa raiy jaǵdaiynyń eskerilýi, katerdiń tehnikalyq jai-kúii jáne áskeri qyzmetshilerdiń qaýipsizdigine jaýapty tulǵalardyń áreketteri tekserilip jatyr.
Eske salaiyq, 24 qyrkúiekte «Hazar Qorǵany – 2026» oqý-jattyǵýy kezinde «Qaisar» katerinen jeke quramdy túsirý barysynda aýa raiy qolaisyz bolyp, áskeri qyzmetshilerdi teńiz aǵysy alyp ketken. Oqiǵaǵa bailanysty qylmystyq is qozǵalyp, arnaiy komissiia quryldy.
Tergeý jalǵasyp jatyr. Iske qatysy bar ózge de tulǵalardyń sheńberi anyqtalýda. Kúdiktilerdiń árqaisysynyń áreketine zańda belgilengen tártippen quqyqtyq baǵa beriledi.
