Taiaýda ótken Úkimettiń keńeitilgen otyrysynda Memleket basshysy salyqtyq ákimshilendirýdi túbegeili jeńildetý boiynsha mindetter qoidy. QR QM Memlekettik kirister komitetiniń tóraǵasy Marat Sultanǵaziev osy tapsyrma qalai oryndalyp jatqanyn aityp berdi, dep habarlaidy QazAqparat.
Atap aitqanda, biyldan bastap jeke tulǵalardyń múlik men jer salyqtary biriktirilgen. Iaǵni eki salyq ta biryńǵai tólemmen tólenedi. Sonymen birge kópqabatty úidegi páter ielerine arnalǵan jer salyǵy alynyp tastaldy. Salyq tóleýshiler úshin múlik salyǵyn tóleýge yńǵaily bolý úshin «E-Salyq Azamat» mobildi qosymshasy jasalǵan. Bul qosymsha málimetterdi toltyrmai salyq tóleýge, 2 minýt ishinde onlain rejiminde shotqa aqsha jiberýdi, artyq tólemderdi basqarýǵa múmkindik beredi. Búgingi tańda salyq ámiianynyń paidalanýshylarynyń sany 130 myńnan asady.
«Eger siz qazir múlik salyǵyn teksergińiz kelse, AppStore nemese PlayMarket-te izdeý jolaǵynda «e-Salyq Azamat» qosymshasynyń atyn terip, júktep alýyńyz kerek. Al jeke kásipkerler úshin «E-Salyq-business» qosymshasy jasalýda», dep atap ótti komitet basshysy.
Ol sonymen qatar jeke kásipkerlikti tirkeýdi jáne jabýdy, salyq eseptiligin tapsyrýdy ońailatý, komissiialyq tólemder men fiskaldyq derekter operatorlarynyń qyzmetteri úshin tólemderdi joiý qarastyrylǵanyn málim etti. Bul qosymshalar eseptilikti avtomatty túrde jasap, salyq tóleýshi ony rastai alady nemese túzetýi engize alady.
