Qarjy vitse-ministri Erjan Birjanov elimizde salyq tólemei júrgen kásipkerler týraly aitty, dep habarlaidy "Ult aqparat" inbusiness.kz saityna silteme jasap.
"Qazirgi kezde kóp salyq tóleýshi tirkeýde túr. Biraq olardyń birazy salyq nysanasynda nóldik kórsetkish kórsetip otyr. 2023 jylǵy birinshi jartyjyldyǵynyń qorytyndysy boiynsha 1,4 mln jeke kásipkerdiń ishinde nóldik kórsetkishti 944 myń salyq tóleýshi kórsetti. Bul óz kezeginde 67 paiyzǵa teń", – dedi ol.
Bul turǵyda 30 paiyzy zańdy túrde salyq tólep jatqanyn aitty.
"Qalǵan 67 paiyzy salyq tólemeidi, nóldik kórsetkish kórsetedi. Ulttyq banktiń deregine júginsek, barlyq tólem bank kartochkasy arqyly ótken. Máselen, bárińiz dúkennen taýar satyp alasyzdar. Olardyń ainalymy bir jyldyń ishinde 55 trln teńge boldy. Al mobildi aýdarymdardyń somasy 80 trln teńgeni quraǵan. Túsinesiz be? Bul rette, tólemderdiń bir bóligi salyq alańynda bolmaǵanyn, tólenbegenin baiqatyp otyr. Bul óz kezeginde jergilikti jerdegi biýdjet shyǵyny sanalady. Qazirgi kezde áleýmettik salanyń damýyna úles qosý úshin osy tólemlerdi tóleý kerek", – dedi vitse-ministr.
Ol eldi mekenderdegi áleýmettik nysandardy tolyqtai qamtamasyz etý úshin salyqtan jaltarýǵa jol bermeý keregin aitady.
"Balalar jaryq ári jyly mektepte oqýy tiis. Halyq jaqsy em alýy kerek. Eger jeke kásipkerler osy 80 trln teńgeden salyq tólemese, olardyń jaǵdaiy qiyn bolady. Sondyqtan osy aqparatty durys jetkizýdi suraimyn", – dedi Erjan Birjanov.
