QR Kásipkerlik sýbektilerin jeńildikpen nesieleý baǵdarlamasyna ózgeris engizildi, dep habarlaidy "Ult aqparat".
«Memleket basshysy Qasym-Jomart Toqaevtyń tapsyrmasyn oryndaý maqsatynda Qazaqstan Ulttyq banki 2020 jylǵy 27 qazandaǵy sheshimimen shaǵyn jáne orta kásipkerlik sýbektilerin jeńildikpen kreditteý baǵdarlamasyna mynadai ózgerister engizdi: tótenshe jaǵdai kezinde zardap shekken iri kásipkerlik sýbektilerin jáne agroónerkásip keshenindegi (AÓK) kásipkerlerdi kreditteýge qosymsha 200 mlrd teńge bólindi; baǵdarlamany qoldaný merzimi 2021 jylǵy 31 jeltoqsanǵa deiin qosa alǵanda; aqshany igerý merzimi – 2021 jylǵy 31 naýryzǵa deiin qosa alǵanda uzartyldy»,– dep habarlady Ulttyq banktiń baspasóz qyzmeti.
Ulttyq bank qabyldaǵan ózgeristerdi iske asyrý jáne baǵdarlamamen qamtýdy keńeitý maqsatynda QR Ulttyq ekonomika ministrligi «Atameken» ulttyq kásipkerler palatasymen birlesip tótenshe jaǵdai ýaqytynda barynsha zardap shekken salalardy anyqtady.
Nátijesinde óndeý ónerkásibinde jáne qyzmet kórsetý salasynda zardap shekken qyzmet túrleriniń tizbesi jasaldy ony QR Ulttyq ekonomika ministrligi 2020 jylǵy 18 qarashada Qazaqstan Ulttyq bankine bekitýge usyndy.
Bul tizbe Qazaqstan Ulttyq banki tóraǵasynyń jáne QR Ulttyq ekonomika ministriniń 2020 jylǵy 18 qarashadaǵy birlesken buiryǵymen bekitildi.
«Tizbege sáikes tótenshe jaǵdaidy engizilgennen keiin shyǵynǵa ushyraǵan jáne ekonomikanyń zardap shekken salalarynda qyzmetin júzege asyratyn iri kásiporyndar jeńildigi bar kreditterdi alý úshin ekinshi deńgeili bankterge ótinish berýge quqyly. Bul rette iri kásipkerlik sýbektisi – bir qaryz alýshyǵa 6 mlrd teńge somasynda limit belgilendi. Shaǵyn jáne orta biznes sýbektilerine arnalǵan limit – 3 mlrd teńge bop saqtaldy, al jeke kásipker úshin ol soma – 50 mln teńgeden kóp emes. Kásipkerlerdi jeńildikpen kreditteý úshin qosymsha bólingen 200 mlrd teńgeden 100 mlrd teńgege limit bólindi, onyń ishinde 70 mlrd teńge ekinshi deńgeili bankter arqyly, jáne 30 mlrd teńge «Agrarlyq nesie korporatsiiasy» AQ arqyly bólinedi.
Baǵdarlamaǵa qatysýshylardyń kóbeiýine bailanysty onyń ataýy Kásipkerlik sýbektilerin jeńildikpen kreditteý baǵdarlamasy dep ózgerdi.
Baǵdarlama Memleket basshysynyń tapsyrmasy boiynsha biylǵy naýryzda qabyldanǵan jáne tótenshe jaǵdai kezinde zardap shekken kásipkerlerdi qoldaýǵa baǵyttalǵan.
18 qarashadaǵy derek boiynsha, ekinshi deńgeidegi bankter 567,4 mlrd teńgege 2 311 ótinish qabyldady. 1 370 shaǵyn jáne orta kásipkerlik sýbektisine (1 168 shaǵyn jáne orta biznes, 202 jeke kásipkerlik) 455,3 mlrd teńge qaryz berildi, onyń ishinde 101,6 mlrd teńge buryn berilgen qaryzdardy óteýden túsken aqsha esebinen berildi.
Bólingen qarajattyń eń kóp úlesi saýda salasyndaǵy shaǵyn jáne orta biznes sýbektilerine – 319 mlrd teńge (70%), qurylysqa – 44,9 mlrd teńge (9,9%), óńdeýshi ónerkásipke – 39,8 mlrd teńge (8,7%) tiesili.
