«Atameken» ulttyq kásipkerler palatasy basqarma tóraǵasynyń orynbasary Erbol Óstemirov kásipkerlikti retteý salasyndaǵy negizgi úrdister týraly aityp berdi, dep habarlaidy QazAqparat.
«Ótken jyly Memleket basshysy retteý is-sharalaryna qatysty tiisti tapsyrma bergen bolatyn. Bul óz kezeginde barsha retteý salasyn qaita qaraýdy bildiredi. Sońǵy jyldary tiisti ońtaily jumys júrgizildi. Kásipkerlerge qolaily jaǵdai jasaý úshin jyl saiyn zań jobalary qabyldanyp keledi. Jalpy, osy reformalar nátijesinde ruqsatnamalar sany bizde 74 paiyzǵa qysqardy, iaǵni buǵan deiin 1,2 myńnan astam ruqsatnamalar bolsa, qazir 278-i qaldy», - dedi E. Óstemirov onlain rejimde ótken konferentsiiada.
Onyń aitýynsha, bizneske qatysty talaptar da azaidy.
«Memlekettik qadaǵalaý salasy ońtalandyryldy, profilaktikalyq baqylaý túsinigi engizilip, tekserýler merzimi qysqardy. Eger eldiń imidji úshin oń nátijege toqtalsaq, Dúniejúzilik bank júrgizetin Doing business reitingi bar. Osy reitingide Qazaqstan sońǵy jyldary 50 pozitsiiaǵa kóterildi», - dedi spiker.
Sonymen qatar ol kásipkerlerge qatysty retteý salasynda máseleler bar ekenin atap ótti. Bul turǵyda ákimshilik jaýapkershilikke tartylǵan kásipkerler sany artqan. Statistika boiynsha 2015 jyldan beri laýazymdy tulǵalar men memlekettik organdar is-qimylyna shaǵym túsirý boiynsha ótinimder kóbeigen.
