Jumysshylarǵa arnap aýylda úi salǵan kásipkerlerge shyǵynnyń 50 paiyzy qaitarylady. Bul týraly búgin Ulttyq qoǵamdyq senim keńesiniń 5-inshi otyrysynda QR Prezidenti Qasym-Jomart Toqaev aitty, dep habarlaidy "Ult aqparat".
«Aýyldyq jerdegi turǵyn úi máselesin sheshý – asa ózekti mindet. Jeke shańyraqqa ie bolǵan jastarymyz aýylda turaqtap qalýdan qashpaityny anyq», - dedi Memleket basshysy.
Osy oraida Prezident aýyldyq jerde úi salý baspana máselesin sheshýmen qatar, ekonomikalyq belsendilikti arttyrýǵa ári turmys sapasyn jaqsartýǵa septigin tigizetinin atap ótti.
«Sondyqtan memleket barynsha qoldaý kórsetýge tiis. Baspana máselesi «Diplommen aýylǵa» baǵdarlamasymen ǵana sheshilmeidi. Bul iske áleýmettik jaýakershiligi bar jumys berýshilerdi jumyldyrý kerek. Kásipker óz jumysshylaryna arnap aýylda úi salsa, memleket oǵan ketken shyǵynnyń 50 paiyzyna deiin qaitaratyn bolady. Bul qai jaǵynan alyp qarasaq ta, bárine paidaly. Jumysty durys jolǵa qoia alsaq, osy bastama aýyldy damytýǵa jan-jaqty septigin tigizedi. Sondai-aq qajetti mamandardy, eń aldymen, muǵalimder men dárigerlerdi, mal dárigerlerin aýylǵa tartýǵa múmkindik beredi. Úkimet bul tásildi osy jyldyń ekinshi jartysynan qaldyrmai qoldanysqa engizýi kerek», - dedi Prezident.
