جۇمىسشىلارعا ارناپ اۋىلدا ٷي سالعان كەسٸپكەرلەرگە شىعىننىڭ 50 پايىزى قايتارىلادى. بۇل تۋرالى بٷگٸن ۇلتتىق قوعامدىق سەنٸم كەڭەسٸنٸڭ 5-ٸنشٸ وتىرىسىندا قر پرەزيدەنتٸ قاسىم-جومارت توقاەۆ ايتتى, دەپ حابارلايدى "ۇلت اقپارات".
«اۋىلدىق جەردەگٸ تۇرعىن ٷي مەسەلەسٸن شەشۋ – اسا ٶزەكتٸ مٸندەت. جەكە شاڭىراققا يە بولعان جاستارىمىز اۋىلدا تۇراقتاپ قالۋدان قاشپايتىنى انىق», - دەدٸ مەملەكەت باسشىسى.
وسى ورايدا پرەزيدەنت اۋىلدىق جەردە ٷي سالۋ باسپانا مەسەلەسٸن شەشۋمەن قاتار, ەكونوميكالىق بەلسەندٸلٸكتٸ ارتتىرۋعا ەرٸ تۇرمىس ساپاسىن جاقسارتۋعا سەپتٸگٸن تيگٸزەتٸنٸن اتاپ ٶتتٸ.
«سوندىقتان مەملەكەت بارىنشا قولداۋ كٶرسەتۋگە تيٸس. باسپانا مەسەلەسٸ «ديپلوممەن اۋىلعا» باعدارلاماسىمەن عانا شەشٸلمەيدٸ. بۇل ٸسكە ەلەۋمەتتٸك جاۋاكەرشٸلٸگٸ بار جۇمىس بەرۋشٸلەردٸ جۇمىلدىرۋ كەرەك. كەسٸپكەر ٶز جۇمىسشىلارىنا ارناپ اۋىلدا ٷي سالسا, مەملەكەت وعان كەتكەن شىعىننىڭ 50 پايىزىنا دەيٸن قايتاراتىن بولادى. بۇل قاي جاعىنان الىپ قاراساق تا, بەرٸنە پايدالى. جۇمىستى دۇرىس جولعا قويا الساق, وسى باستاما اۋىلدى دامىتۋعا جان-جاقتى سەپتٸگٸن تيگٸزەدٸ. سونداي-اق قاجەتتٸ مامانداردى, ەڭ الدىمەن, مۇعالٸمدەر مەن دەرٸگەرلەردٸ, مال دەرٸگەرلەرٸن اۋىلعا تارتۋعا مٷمكٸندٸك بەرەدٸ. ٷكٸمەت بۇل تەسٸلدٸ وسى جىلدىڭ ەكٸنشٸ جارتىسىنان قالدىرماي قولدانىسقا ەنگٸزۋٸ كەرەك», - دەدٸ پرەزيدەنت.
