Foto: pinterest
Ult.kz-te jihankez jýrnalist Dinara Bolattyń ózge paiymy.
Qarjylai saýatty bolý, aqshany retimen jumsap, ony jinap saqtaý qajet ekendigin túsiný, sol túsinikpen ómir súrýdiń ózi — adamnyń ósý jolyna túskendigin kórsetedi. Bul jerdegi basty nárse “aqsha jinaý qolymnan kelmeidi”, “ armanym qashan oryndalar eken?”, “mundai ómir biz siiaqtylarǵa múmkin emes” degen keritartpa túsinikterden arylyp, amal etý deńgeiine shyǵý.
Úlken aqsha birden jinalmaidy. Nátijege birden, tez arada jete salý múmkin emes. Bul úlken jol. Eń bastysy — sol jolǵa túsip, qadamdar jasai bastaý. Ár adamnyń tabysy ártúrli. Oǵan qajet úlken somma da, maqsaty da ártúrli.
Aqsha jinaýdyń basty qaǵidasy
Aqshany kóp tapqanda jinai bastaimyn deý — oryndalmas arman. Aqsha jinaýdy az tabyspen de bastaýǵa bolady.
Aqsha jinaýdyń eń basty talaby — ár tabystyń eń keminde 10% -yn saqtap otyrý jáne jinalyp jatqan aqshaǵa eshqandai jaǵdaida da qol tigizbeý. Belgili bir nársege aqsha jetpei jatqan jaǵdaida da qaryz, nesie almai, qosymsha tabys tabý arqyly ǵana sol qajettilikti jabý negizgi qaǵida.
Aqsha tek aldynda naqty maqsaty bar adamda tez jinalady. Sebebi adamnyń sanasynda maqsatqa jetý jolynyń kórinisi, jospary aiqyn kórinedi. Ustansa júie, tártip bolady. Tártip bolý úshin alǵa qoiǵan maqsat, qajettiligi óte zor bolýy tiis.
Kún saiyn ádemi bolyp, ýaqytsha qataryńnyń aldy, biraq baspanasyz júrý mańyzdy ma, álde aldymen qaýipsizdik qoryn jasap alyp, keiin erkin kiinip, qydyrǵan jaqsy ma? Kóp qajettiliktiń ishinen eń mańyzdysyn ajyratyp, sol boiynsha jumys istegen jón.
Máselen, baspanaly bolýdy maqsat etetin stýdent nemese jas qyzmetker 3-5 jylda páterdiń tutas qunyn emes, onyń alǵashqy jarnasyn ǵana jinai alatynyn túsinýi kerek. Iaǵni, bir jyl aiaqtalǵan kezde turaqty jinalǵan aqsha alǵashqy jarna qorynyń 10-20% quraýy tiis. Kelesi jyly osy tabyspen nemese ony kóbeitý arqyly biylǵydan kóbirek aqsha jinap, páterdiń alǵashqy jarnasy jinalatyn jyldardy azaita alady. Osylaisha maqsatyn oryndaýǵa kirisken ár jas adam jyl sońynda ózi belgilegen mejege jetken, tolyqqandy jaily sezimmen aiaqtaidy. Birizdilik, turaqtylyq bar jerde bári múmkin ekenin túsinedi.
Paiym
Endigi kezekte aqshanyń jai kelip-ketip, árdaiym jetpei jatqan sezimi ony basqarmaidy. Adamdy aqsha úrei, mazasyzdyq arqyly bilemeidi. Qarjylyq saýattylyq jolyna túsken, aqshamen qatynasyn rettegen adam endi ony basqarady. Qoiylǵan úlken qarjylyq maqsatqa birden jetý múmkin emes. Biraq durys qurylǵan jospar jáne ony qatań qadaǵalaý — árqashan nátijege ákeledi.
Al eń bastysy qarjylyq saýat jolyna túsken adam ol — ósý jolyna túsken adam. Óz qarajatyn basqaryp, aqsha jinaý ádeti arqyly bolashaǵyna jol salý ómirinde tutas tártip ornatýmen teń. Munyń ózi úlken jeńis.
.jpg)
