Qarjy salasyndaǵy túrli suraqtar boiynsha el azamattary jedel jelige 23 myńnan astam habarlama qaldyrǵan. Bul týraly fingramota.kz júrgizigen taldaýdyń nátijesinde belgili boldy, dep habarlaidy "Ult aqparat".
Qarjylyq qyzmetterdi tutynýshylardyń quqyqtary men múddelerin qorǵaý máseleleri boiynsha azamattardyń ótinishterine jedel den qoiý maqsatynda QR Qarjy naryǵyn retteý jáne damytý agenttigi 2020 jylǵy 26 naýryzdan bastap qarjylyq qyzmetterdi tutynýshylardyń quqyqtaryn qorǵaý máseleleri boiynsha jedel jelini iske qosty.
«Jedel jeli arqyly qazirgi kezde azamattardan qarjylyq qyzmetterdi tutynýshylardyń quqyqtaryn qorǵaý, onyń ishinde karantin kezeńinde kreditter boiynsha merzimin keiinge qaldyrýǵa ruqsat alý, qashyqtan banktik qyzmet kórsetý máseleleri boiynsha 23 myńnan astam qońyraý kelip tústi jáne óńdeldi», - delingen habarlamada.
Halyqtyń qarjy retteýshisimen ózara is-qimyly maqsatynda jáne QR Úkimetiniń biylǵy 30 mamyrdaǵy №338 Qaýlysymen bekitilgen Qarjylyq saýattylyqty arttyrýdyń 2020-2024 jyldarǵa arnalǵan tujyrymdamasy boiynsha is-sharalar josparyn iske asyrý aiasynda Agenttik 2020 jylǵy 25 maýsymnan bastap «Fingramota Online» mobildi qosymshany iske qosty. Bul qarjy retteýshisiniń halyqpen jáne biznespen ózara is-áreketiniń yńǵaily quraly. Osy messendjer arqyly qarjy retteýshisine qarjylyq qyzmetterdi tutynýshylardyń quqyqtary men múddelerin qorǵaý, qarjy jáne ózge de uiymdardyń qyzmeti, qarjylyq saýattylyqty arttyrý, Ipotekalyq turǵyn úi qaryzdaryn qaita qarjylandyrý baǵdarlamasyn iske asyrý ári basqa da máseleler boiynsha 1800-den astam suraq kelip túsken.
