2020 jyly ákimshilendirý jáne tsifrlandyrý esebinen qosymsha 710 mlrd teńge salyq tústi. Bul týraly búgin Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Táýekelderdi basqarý júiesiniń qoldanylý aiasyn keńeittik. Jalpy, táýekelderdiń 86 túrli modeli quryldy, 12 mlrd astam tsifrlyq qujattar óńdeldi. Nátijesinde tsifrlandyrý jáne ákimshilendirýdiń esebinen 2019 jyly qosymsha 916 mlrd teńge qamtamasyz etildi. 2020 jyldan bastap onlain-baqylaý kassa mashinalaryn qoldanýǵa jappai kóshý júrgizildi», - dedi ol.
Ministrdiń aitýynsha, «E-tereze» aqparattyq júiesi ruqsat qujattaryn beretin 13 aqparattyq júieni biriktirdi. Qyzmetterdi alý ýaqyty 30 kúnnen 5 kúnge deiin qysqardy.
«2020 jyldyń qorytyndysy boiynsha ákimshilendirý jáne tsifrlandyrý esebinen qosymsha 710 mlrd teńge salyq túsimderi qamtamasyz etildi», - dedi Erulan Jamaýbaev.
Sonymen qatar ol Qarjy ministrligi ákimshilendirýdi odan ári jetildirý jáne biýdjetti tolyqtyrý úshin tsifrlandyrýǵa basa nazar aýdara otyryp, birqatar naqty sharalar ázirlegenin aitty. Atalǵan sharalardyń qatarynda transshekaralyq saýdany baqylaýdy kúsheitý; kedendik infraqurylymdy jańǵyrtý; aqparattyq júielerdi jetildirý jáne jańa platformaǵa kóshý; iri salyq tóleýshilerdiń kóldeneń monitoringin qoldaný; halyq pen bizneske arnalǵan mobildi qosymshalardy damytý; zańnamany jetildirý bar.
