Egde adamdardyń koronavirýs juqtyrý jaǵdailary jiilep barady. Bul týraly búgin OKQ-da ótken jiynda Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
«Indetti juqtyrý jaǵdailaryn tekserý barysynda myna jaǵdailar anyqtaldy. koronavirýsty juqtyrǵandardyń 50 paiyzy meditsinalyq kómekke júgingen kezde anyqtalǵan. 33 paiyzy olarmen qarym-qatynasta bolǵandardy tekserý barysynda juqtyrǵany belgili bolyp otyr. 16 paiyzy aldyn alý sharalaryn júrgizgen kezde anyqtaldy. Qalǵan 1 paiyzy – syrttan kelgenderden anyqtalyp otyr. Iaǵni, bul degenimiz karantin sharalarynyń saqtalmaýy, buqaralyq oryndarǵa halyqtyń jii barýy, jeke qorǵanys quraldaryn qoldanbaýy saldarynan indettiń ýshyqqanyn kórsetip otyr. Indet syrttan kelip jatqan joq, el ishinen bir-birine tarap jatyr», - dedi Marat Shoranov OKQ-da ótken baspasóz máslihatynda.
Birinshi vitse-ministr sonymen qatar, halyqtyń basqa da toptarynyń ishinde indetti juqtyrý jaǵdaiy artyp kele jatqanyn atap ótti.
«Jumys istemeitin, zeinet jasyndaǵy azamattardyń koronavirýsty juqtyrý jaǵdaiy jiilep barady. Iaǵni, buǵan olarmen bir úide turatyn azamattardyń karantin sharalaryn saqtamaýy sebep bolýy múmkin. Ásirese Aqmola, Almaty, Pavlodar oblystarynda egde jastaǵy azamattardyń koronavirýs juqtyrý jaǵdailary kóbeigen», - dedi ol.
