QR Prezidentiniń kómekshisi Erlan Qarin Májiliste jerdi sheteldikterge berýge birjola tyiym salýdy kózdeitin zań jobasynyń birinshi oqylymda maquldanýyna bailanysty pikir bildirdi, dep habarlaidy "Ult aqparat".
«Sheteldikterge jáne óziniń úlesinde sheteldik qatysýy bar zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde tyiym salýdy qamtyǵan Prizidenttik zań jobasy Májiliste birinshi oqylymnan ótti. 2021 jyldyń 12 naýryzynda Prezident retinde zań shyǵarýǵa bastamashylyq etý quqyǵyn paidalanyp, Qasym-Jomart Toqaev Májiliske atalǵan zań jobasyn engizdi. Jumys tobynyń 3 otyrysy (18,29 mamyrda jáne 5 sáýirde), sondai-aq Agrarlyq máseleler komitetiniń keńeitilgen otyrysy (30 naýryz) ótti. Osy pikir almasýlarǵa qatysýshylar qujatty tolyqtai qoldady jáne Májilistiń jalpy otyrysyna shyǵaryldy», - dep jazdy Qarin Telegram paraqshasynda.
Osy oraida ol búgin ótken jalpy otyrysta zań jobasy birinshi oqylymda qaralǵanyn eske saldy.
«Zań jobasynyń negizgi erejelerin Aýyl sharýashylyǵy ministri Saparhan Omarov tanystyrdy. Talqylaý qorytyndysy boiynsha Májilistiń barlyq fraktsiialarynyń depýtattary qujatty birinshi oqylymda maquldady. Endi zań jobasy ekinshi oqylymda qaralatyn bolady», - dedi E. Qarin.
Budan buryn habarlanǵandai, búgin Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasy birinshi oqylymda maquldandy.
