Ulttyq qaýipsizdik komiteti memleketke opasyzdyq jasaý, bilikti kúshpen basyp alý jáne laýazymdyq mindetterin asyra paidalaný kúdigi boiynsha Másimov pen basqa da adamdarǵa qatysty qylmystyq is boiynsha jańa derekter jariialady, - dep habarlaidy "Ult aqparat".
Sonymen qatar, tergeý barysynda Másimov áreketterinde sybailas jemqorlyq belgileri kóp anyqtalǵany habarlandy.
"Otandyq biznes qaýymdastyqtary men sheteldik sýbekt ókilderinen jyljymaityn múlik, qymbat syilyqtar, sonyń ishinde mádeni qundylyqtar, eleýli mólsherde aqshalai qarajat alý derekteri qujatqa tústi.
Atap aitqanda, UQK tóraǵasy laýazymynda Másimovtiń jabyq kelisimsharttardyń biri boiynsha shet memleket ókilderinen 2 million AQSh dollary somasynda para alý deregine tergeý júrip jatyr", - delingen habarlamada.
Atalǵan qarajattyń Gonkongtan Qazaqstan Ulttyq bankine qaitarylýy qamtamasyz etiletini aityldy.
Sondai-aq, Másimov premer-ministr laýazymynda bolǵanda elordada biznes-qurylymdardyń birinen quny 2,5 milliard teńgege jýyq elitalyq qonaqúi men jer ýchaskesin alý deregi boiynsha tergeý bastaldy.
Másimov ustalǵannan keiin, 2022 jyldyń qańtarynda bul qonaqúiden 17,2 million AQSh dollary, sondai-aq kóptegen sándi zattar - elitalyq saǵattar, altyn quimalar, antikvariat jáne taǵy basqa zattar tárkilengeni habarlandy.
Odan bólek, biznes-klass sanatyndaǵy 11 qymbat avtokólik tárkilendi.
Nur-Sultan qalasyndaǵy eki elitalyq páterine, Almatydaǵy eki páterge jáne saraiǵa, sondai-aq, Shýchinsk-Býrabai kýrorttyq aimaǵyndaǵy kóldiń jaǵasyndaǵy aýdany 1 gektar jer ýchaskesine tyiym salyndy.
Másimovpen jaqyn bailanystaǵy adamdardan 5,1 million dollar tárkilendi.
"Osymen bir mezgilde Másimov pen onyń ainalasyndaǵylar shetel bankterine zańsyz shyǵarǵan asa iri mólsherdegi aqshalai qarajatty izdestirý, buǵattaý jáne Qazaqstanǵa qaitarý boiynsha jumys uiymdastyryldy", - delingen habarlamada.
UQK málimetinshe, barlyq kórsetilgen derekter boiynsha qarqyndy jedel-tergeý is-sharalary júrip jatyr.
