QR Densaýlyq saqtaý ministri Eljan Birtanov tótenshe jaǵdai boiynsha memlekettik komissiianyń sońǵy sheshimderine bailanysty aqparat berdi, dep habarlaidy "Ult aqparat".
«Bizdiń elimizde qabyldanǵan qatań karantindik sharalar 28 naýryz ben keshegi táýlikti eseptegende koronavirýs infektsiiasynyń taralý qarqynyn 52-den 12 paiyzǵa deiin tómendetýge múmkindik berdi. Bul ózgeris bizge sanitarlyq jáne meditsinalyq qyzmetterdiń jumys aýyrtpalyǵyn azaityp, naýqastar men bailanysqan adamdarǵa tiimdi kómek kórsetýge múmkindik beredi», - dep jazdy Eljan Birtanov Facebook paraqshasynda.
Áitse de ministr atap ótkendei Qazaqstanda koronavirýs juqtyrǵandardyń sany artyp barady. Basqa elderdiń tájiribesi Qazaqstanda aýrýdyń negizgi kezeńi sáýir-mamyrda ótse, virýstyń sharyqtaý shyńy - sáýirdiń birinshi jartysyna tuspa-tus keletinin boljaýǵa múmkindik beredi.
«Osy kezeńde biz shamamen 3500 jaǵdai tirkeletinin (qazir 551) boljaimyz. Odan ary, iaǵni jaz ailarynda epidemiologtar epidemiia tolyǵymen toqtamasa da baiaýlaitynyn kútedi. Keibir sarapshy biylǵy kúzde indettiń qaitalanatynyn joqqa shyǵarmaidy», - deidi ol.
Ministr bergen málimetke sáikes, elimizge búgingi tańda koronavirýs infektsiiasynan naýqastardy emdeý maqsatynda 3920 infektsiialyq, sonymen qatar 7300 provizorlyq tósek oryn daiyndalǵanyn aitady. Budan bólek 180 aýyr naýqasty qabyldaýǵa qabiletti jansaqtaý bólimshesi ázir ekenin, onda 170 jasandy tynys alý apparaty, qan oksigenatsiiasynyń ekstrakorporaldy membrananaly 38 apparaty baryn jetkizdi.
«Alaida patsientter juqpaly aýrýlar aýrýhanasynda ortasha eseppen 3-4 apta ótkizetinin, eldi mekenderdiń tirshiligin qamtamasyz etýmen ainalysatyn kásiporyndar men qyzmetterdiń komandalarynda - meditsina qyzmetkerleri, politsiia, Qarýly Kúshterde infektsiianyń paida bolý qaýpin eskergende Qazaqstanda ázirge kóbirek tósek oryn men arnaiy aýrýhana kerektigi baiqalady. Sonymen qatar ol aýrýhanalar infektsiialyq qaýipsizdiktiń barlyq talabyna sai bolýy kerek. Onda bokstalǵan palatalar, ventiliatsiianyń erekshe júiesi, jansaqtaý bólimindegi oryndar bolýy tiis. Mundai tez turǵyzylatyn emhanalardyń Qytaida qalai paidaǵa jaraǵanyn kórdik. AQSh pen Italiia, ózge de eýropalyq elderdegi qarapaiym emhanalarǵa qandai júkteme túsip otyrǵanynan da habardarmyz. Kóptegen el naýqastar men meditsinalyq personaldar úshin infektsiialyq qaýipsizdik tehnologiialary saqtalmaǵan nysandar men sporttyq qurylymdardy paidalanýǵa májbúr», - deidi ministr.
Eljan Birtanov osy máseleni eskere kele Densaýlyq saqtaý ministrligi Qazaqstannyń iri úsh qalasy – Nur-Sultan, Almaty men Shymkent qalasynda jedel turǵyzylatyn úsh infektsiialyq aýrýhananyń (200-300 oryndyq) kerektigi týraly usynys engizgenin málim etti. Bul jobalardy júzege asyrýǵa jergilikti atqarýshy organdar jaýapty.
«Bizdiń qurylys kompaniialary bul máselede úlken qoldaý kórsetip jatyr. Qurylysty 15-20 kúnniń ishinde aiaqtaý josparlanǵan. Jyldam tehnologiialar, daiyn blok-modýldik sheshimder, zamanǵa sai infektsiialyq qaýipsizdik júieleri qoldanylady. Qajetti meditsinalyq jáne zerthanalyq jabdyqtar ornatylady. Mundai sharalar elimizdiń koronavirýs pandemiiasynyń saldaryn ǵana emes, bolashaqta múmkin bolatyn indetterdi joiýǵa múmkindik beredi», - deidi Eljan Birtanov.
Ministr atap ótkendei álem mundai jahandyq deńgeidegi qaýipti tegeýringe daiyn bolmai qalǵan. Álem elderiniń densaýlyq saqtaý júieleri diabet, gipertoniia, onkologiia sekildi sozylmaly aýrýlardy emdeýge basymdyq bergen. Sol úshin adamzattyń aldynda qoǵamdyq densaýlyq saqtaý júiesin qaita qarap, mundai indetke daiyn bolý mindeti tur.
«Osy jazbanyń izinshe koronavirýs pandemiiasyna qarsy kúreste qoldaý men túsinistik bildirgen halyqqa alǵysymdy aitqym keledi. Tek resmi aqparat kózderine senip, osy salanyń mamandaryna ǵana qulaq túrgen abzal. Osy tótenshe ári shuǵyl sharalardyń bári de bizdiń halyqtyń densaýlyǵy úshin jasalyp jatyr. Biz birgemiz», - dep túiindedi Eljan Birtanov.
