Mádeniet jáne sport ministri Aqtoty Raiymqulova Qazaqstan aýmaǵynan tys sporttyq saiystarǵa qatysý úshin qai sportshylarǵa shetelge shyǵýǵa ruqsat beriletinin aityp berdi, dep habarlaidy "Ult aqparat".
«Vedomstvoaralyq komissiianyń 13 qazandaǵy hattamalyq sheshimi negizinde «Astana» prezidenttik basketbol klýbynyń múshelerine VTB Birikken Ligasynyń chempionatyna qatysý úshin elden shyǵyp, qaita oralýǵa ruqsat etiledi. Bul sheshim VTB Birikken ligasynyń chempionat matchtary kezinde sanitarlyq-epidemiologiialyq is-sharalardy ótkizý tártibin ázirlegenin eskere otyryp qabyldandy», - dedi Aqtoty Raiymqulova OKQ-da ótken brifingte.
Onyń aitýynsha, mundai sporttyq is-sharalardan bas tartqan jaǵdaida komandany chempionatqa qatysýshylar qatarynan shyǵaryp jiberýi múmkin.
«Qazaqstannyń fýtboldan ulttyq quramasy týraly: qazirgi ýaqytta ÝEFA-da Qazaqstannyń úsh ulttyq quramasy oinaidy. Olar: Qazaqstannyń ulttyq quramasy, 21 jasqa deiingi jastar quramasy jáne Qazaqstannyń áielder quramasy. Búgingi tańda atalǵan komandalardyń matchtarǵa qatysý kestesi jasaldy. Sondai-aq, ÝEFA talaptaryna sáikes, Qazaqstan quramasy birqatar joldastyq kezdesýler ótkizýi kerek, áitpese reglamentke sáikes aitarlyqtai shekteýge ushyraidy. Vedomstvoaralyq komissiia hattamasynyń 20 shildedegi sheshimine sáikes, 2020 jylǵy qyrkúiekten jeltoqsanǵa deiin ÝEFA Ulttar ligasynyń matchtaryna qatysý úshin ulttyq, jastar jáne áielder quramasyna ÝEFA-nyń Ulttyq ligasynda jáne jastar arasyndaǵy Eýropa chempionatyna qatysý maqsatynda elden kirip, shyǵýǵa ruqsat etilgen», - dedi ministr.
Aqtoty Raiymqulova bul rette sportshylardyń densaýlyǵyna basa mán beriletinin jetkizdi.
«Barlyq týrnirler kórermenderdiń qatysýynsyz ótedi, tek sportshylar oinaidy. Bul - búkil álemdegi tájiribe. Ózderińiz biletindei, Olimpiada oiyndaryn, Álem chempionattary men Eýropa chempionattaryn bir jyldan az ýaqyttyń ishinde ótkizý josparlanǵan. Bizdiń sportshylardyń ol saiystarǵa qatysýy, olardyń sporttyq formada bolýy asa qajet. Sondyqtan barlyq táýekelderdi eskere otyryp, qajetti sharalardy normalarǵa sáikes júzege asyryp, QR Vedomstvoaralyq komissiia osy is-sharalarǵa qatysýǵa múmkindik berdi. Biz ózimiz barlyq normalardyń saqtalýyn qadaǵalaimyz», - dedi ol.
