Qaraqshylar Talǵardaǵy Kaspi Bank bólimshesinen 40 mln teńge urlap ketken, dep habarlaidy "Ult aqparat" banktiń baspasóz qyzmetine silteme jasap.
«Keibir BAQ Talǵar bólimshesin tonaý kezinde Kaspi Bank-tiń shyǵyny týraly aqparatty asyǵys taratqan. Bul aqparattyń shyndyqqa sai emestigin, anyqtalǵan aqparat boiynsha shyǵyn kólemi 40 mln teńge shamasynda ekenin habarlaimyz. Shyǵyn tolyqtai banktiń óz esebinen jabylady. Biz úshin eń mańyzdy nárse - klientterimiz ben qyzmetkerlerimizdiń ómiri men densaýlyǵy. Qalǵany orny tolatyn olqylyqtar», - dedi baspasóz qyzmetinen.
Sondai-aq, bank basshylyǵy tonaýshylar týraly aqparat bergenderge 5 million teńge beretindigin jariialaǵan bolatyn.
«Kaspi Bank 22 tamyz kúni Talǵar qalasyndaǵy bólimshege qaraqshylyq shabýyl jasaýǵa qatysy bar qylmyskerlerdi ustaýǵa múmkindik beretin mańyzdy aqparatty usynǵandarǵa 5 million teńge syiaqy beredi. Bul aqparatty banktiń Qaýipsizdik qyzmetine +7 747 388 29 34 telefony arqyly habarlaýǵa bolady», - dep jazylǵan habarlamada.
Aita ketý kerek, keshe Kaspi Bank-tiń Almaty oblysynyń Talǵar qalasynda ornalasqan bólimshesine qaraqshylyq shabýyl jasaldy. Beinebaqylaý kamerasyna túsken kadrda betine betperde kigen eki adam ǵimarattyń tóbesinen túsedi. Olardyń biri bank qyzmetkerleriniń qoldaryn bailaýmen ainalysyp jatqanda, ekinshisi kassadaǵy aqshany sómkege sala bastaidy. Qaraqshylardyń qansha aqsha alyp ketkeni ázirge belgisiz. Banktiń baspasóz qyzmetinen málim etkendei, qaraqshylyq shabýyl kezinde ǵimaratta bank klientteri bolmaǵan. Bank qyzmetkerleri zardap shekken joq.
