Qaraǵandylyq áiel kúieýiniń týǵan inisin Siriiadaǵy soǵysqa alyp ketpek bolǵan sátinde ustaldy. 30 jastaǵy Jansaia Tańatarova qazir sot aldynda jaýap berip jatyr. Bala áli kámelet jasyna tolmaǵan. Dese de, ol sot otyrysynda óz jeńgesin barynsha qorǵap-baǵýda, dep málimdedi informburo.31.kz.
Jansaianyń kúieýi de ekstremizm baby boiynsha aiyptalyp, buǵan deiin sottalyp ketken eken. Kúieýiniń jolyn ári qarai jalǵastyrmaq bolǵan áiel DAISh lańkestik uiymyna qosylyp, onyń sapyna jas jigitterdi tartpaq bolǵan. Ol 17 jastaǵy qainysy Saǵi Joldybaevqa jalǵan qujat jasap berýge ýáde beripti jáne ony jasyryn jolmen Siriiaǵa jibergeli jatqanda qaýipsizdik komitetiniń quryǵyna ilindi.
Bala eki jyldan beri teris dini aǵymnyń yqpalynda. Ol sotta jeńgesine shań jýytqan joq. Degenmen, Saǵidyń ata-anasy oǵan "dindarlar" tarapynan qysymnyń bolǵanyn aitady. Óitkeni, buǵan deiin jasóspirim jeńgesiniń ózinen aqsha talap etkenin málimdepti.
«Ulymdy qorqytyp tastaǵan. Nege qorqytqanyn bilmeimin. Uialy telefonmen túrli habarlama jazǵan: kýáligińdi ákel, pasportyńdy jóndep beremin, "sen - meniń balamsyń" dep jazǵandaryn ózim oqydym», - deidi Saǵidyń anasy Jańyl Joldybaeva.
Memlekettik aiyptaýshylar Jansaianyń Siriiaǵa shyǵý josparyn tizbektep úlgerdi. Sózderinshe, áýeli Qaraǵandydan Jambyl oblysyna barýy tiis bolǵan áiel shekara asyp, Qyrǵyzstanǵa ushýdy oilastyrypty. Keiin Stambýl qalasyna attanyp, sol jerdegi lańkestermen Siriia Arab Respýblikasyna ketýdi josparlaǵan.
