Jezqazǵandyq Tólegen Jamanov Júrsin Ermannyń 70 jyldyǵyna arnalǵan respýblikalyq aitystyń bas júldesine ie boldy. Shyǵarmashylyq jarys Qaraǵandyda ótti, oǵan elimizdiń ár óńirinen 16 tanymal aqyn qatysty, dep habarlaidy QazAqparat.
Júrgizýshi QR eńbek sińirgen qairatkeri Amanjol Áltaev boldy.
«Aitys meniń otanymda ótip jatyr. Munda eń myqty aqyndar keldi, olardy qazaq ziialylarynyń kórnekti qairatkerleri baǵalaidy. Buǵan deiin Saryarqanyń jerinde Qazybek bi men Sáken Seifýllinge arnalǵan úlken aitystar ótkizilgen. Búgingi kún de joǵary deńgeide ótedi jáne biz tamasha keshtiń qatysýshylary bolamyz dep senemin», – dedi ol baiqaýdyń ashylýynda.
9 saǵatqa sozylǵan aitysta aqyndar qazirgi zamannyń ózekti taqyryptaryn kóterdi. Olar elimizdiń Táýelsizdigi men Saryarqa týraly jyr tolǵap, qoǵamnyń ózekti máselelerin qozǵady. Aityskerlerdiń sýyryp salma óleńderi mereitoi iesine de arnaldy.
Shyǵarmashylyq jarys qorytyndysy boiynsha Qaraǵandy oblysy Jezqazǵan qalasynyń turǵyny Tólegen Jamanov respýblikalyq aitystyń bas júldesin jeńip aldy.
Batys Qazaqstan oblysynan kelgen Jansaia Mýsina birinshi orynǵa ie boldy. Ekinshi oryndy úsh aqyn bólisti – olar Erkebulan Qainazar (Nur-Sultan q.), Aitbai Jumaǵulov (Qaraǵandy oblysy) jáne Qalijan Bildashev (Shymkent qalasy).
Úshinshi orynǵa bes aitysker ie boldy: Ásem Ereje (ShQO), Baýyrjan Shirmedinuly (BQO), Shalqarbai Izbasarov (Atyraý oblysy) jáne qaraǵandylyqtar Tilegen Ádilet jáne Ómirjan Kópbosynov.
Sondai-aq ataýly syilyqtar berildi. Doskei Álimbai atyndaǵy arnaiy júldeni qyzylordalyq Muhtar Niiazov, Narmanbet Ormanbetuly atyndaǵy syilyqty Pavlodardan kelgen Raýan Qaidarov, Kóshen Eleý atyndaǵy syilyqty Pavlodardan kelgen Aspanbek Shuǵataev ielendi. Almatydan kelgen Qaziret Berdihan Qasym Amanjolov atyndaǵy arnaiy syilyqqa, Aqtóbeden kelgen Marat Ahmetov Shashýbai Qoshqarbaiuly atyndaǵy syilyqqa jáne Túrkistannan kelgen Bekarys Shoibekov Júrsin Erman atyndaǵy syilyqqa ie boldy.
Barlyq aqynǵa diplomdar men aqshalai sertifikattar tabys etildi.
