Búgin Qaraǵandy meditsinalyq ortalyǵyna barlyq shuǵyl qyzmetter jinaldy. Ǵimaratta kúdikti paket tabyldy, dep habarlaidy QazAqparat.
4 sáýirde saǵat 9.05-te Qaraǵandy qalasy PB Ońtústik-Shyǵys politsiia bóliminiń kezekshi bólimine Muqanov kóshesindegi oblystyq meditsinalyq ortalyqta qol jýǵysh shuńǵylshanyń astynan skotchpen oralǵan zat tabylǵany týraly habarlama kelip tústi.
«Qaraǵandy oblysy PD jedel kezekshisi oqiǵa ornyna barlyq shuǵyl qyzmetterdi jiberdi. Meditsinalyq mekeme ǵimaratynan 400-ge jýyq adam evakýatsiialandy, onyń ishinde medpersonal, patsientter, kelýshiler bar», - dep habarlady Qaraǵandy oblysy PD baspasóz qyzmeti.
Politsiia qyzmetkerleri tabylǵan zatty – túimeli uialy telefondy, oǵan arnalǵan qýattaý qurylǵysyn qarap shyqty. Saǵat 10.00-de dabyldy toqtatý týraly belgi berildi. Qazirgi ýaqytta meditsinalyq ortalyq qalypty rejimde jumys isteýde.
